Meghalaya Youth League: Pynskhem ka WJDSA ha ka kyrdan ba nyngkong na ka Group B; 10 kol khyrwit jem ka Ri-Bhoi ïa ka Sohra

Shillong, Nailur 15: Ka West Jaintia District Sports Association ka la pynskhem ïalade ha khliehduh jong ka miej kheiñ point na ka Zone B ha baroh ar tylli ki kyrdan ïakhun, kata ha ka U-14 bad U-16 ha kane ka Meghalaya Youth League 2024 hadien ba la pyndep baroh ki jingïalehkai ha ka Round Robin stage ha ka Sngi Saitjaiñ.
Kane ka lympung la pynlong da ka Meghalaya Football Association ryngkat ka jingkyrshan na ka sorkar jylla Meghalaya.
Ka West Jaintia kaba la lah ban kiar na ka namrem ha ka kynhun ba bat kyrdan ba ar – ka Amlarem Block Sports Association, ka la lah ban jop da 4-0 kol ha ka kyrdan ïalehkai kiba hapoh 14 snem, ha kaba u Kaisarmi Dkhar u la khyrwit hat-trick na bynta ka WJDSA. Hadien nangta kane ka WJDSA ka la ïakhaid da mar 1-1 kol ha ka kyrdan ïalehkai kiba hapoh 16 snem.
Da kane ka namjop ka West Jaintia ka la kynjoh 21 point, katba ka Amlarem ka la ïoh 13 point ha ka kyrdan ïalehkai Under-14, ha ka Under-16 ka la ïoh 17 point, katba ka Amlarem ka la khur 11 point.
Ha kawei pat ka liang, ka Laskein Block Sports Association ka la pyndep ïa ka jingïalehkai kaba khadduh mynta ka samoi da kaba ïakhaid mar 2-2 kol bad ka East Jaintia District Football Association ha ka kyrdan ïalehkai ki U-14. Katba ha ka kyrdan ïalehkai U-16 ka East Jaintia ka la jop da 1-0 kol.
Ha ka Zone C, ka Ri-Bhoi District Sports Association ka la ïakhun hala ïing pyrshah ïa ka Sohra Sports Association bad ka la jop ha baroh ar tylli ki kyrdan da ka namjop kaba i shongkun – kat ban jop da 5-0 kol ha ka kyrdan U-14 bad khyrwit kput haduh 10-0 kol ha ka U-16. U Iaisynroplang Syiemlieh bad u Me-u-ba-ai Sumer baroh ar ngut ki la ïoh ban khyrwit hat-trick ha kine ki jingïakhun.
Ka la don ruh kawei ka jingïalehkai ha ka kyrdan U-16 hapdeng ka Shillong Sports Association bad ka Western Ri-Bhoi Association, ha kaba ka SSA ka la jop suk da 4-0 kol. Hynrei ka RBDSA ka dang ïai lamkhmat hakhliehduh ha baroh ar tylli ki kyrdan, bud sa ka Shillong Sports Association ha ka kyrdan ba ar.
Haba phai sha ka Zone D, la sakhi ïa ka Nongstoin District Sports Association kaba la khur namjop ha baroh ar ki kyrdan hadien ba ka la lah ban pynliem noh ïa ka Mawshynrut Sports Association da 5-0 kol ha ka U-14, ha kaba u U Ronifield Dkhar Rit u la khyrwit lai kol. Nangta ka kynhun ka la bteng ban jop da 4-0 kol ha ka U-16.
Ka Pyndengumiong District Sports Association ka la jop baroh ar ki jingïakhun pyrshah ïa ka Mawkyrwat District Sports Association, ban pynliem da 1-0 kol (U-14 bad 16), ha kaba kane ka namjop ha ka U-16 ka la kyntiew ïa ki na ka kyrdan ba san sha ka kyrdan ba lai ha ka miej kheiñ point.
Kiwei pat ki jingïalehkai ki long hapdeng ka Eastern Border Sports Association bad ka Tyrsad Area Sports Association. Ka EBSA ka la khur namjop ha ka U-14 da 2-0 kol hynrei ha ka U-16 ka la ïakhaid da mar 2-2 kol.
Ka Nongstoin ka long ka kynhun kaba lamkhmat na kane ka Zone ha baroh ar ki kyrdan, bud sa ka Pyndengumiong ba wan ba ar ha ka U-14, katba ka Eastern Border ka la bat kyrdan ba ar ha ka U-16.
Katkum ka jingpynïaid ba la buh ryntih, ki ar tylli ki kynhun ba wan hakhmat na man ki zone kin jam sha ka wat ïakhun quarterfinal ka ban long ha u bnai ban wan. Na ka Zone A, ba hap hapoh Garo Hills, ka ladep lypa baroh ki jingïalehkai.