Markhmat tohkit ka Dr. Bharati Pawar ïa ka jingtreikam ki skhim Sorkar Pdeng ha EJH

Shillong, Nailar, 26: Ka Myntri Khynnah ka Sorkar Pdeng kaba peit ïa ka Tnat ka koit ka khiah, ka Dr Bharati Pravin Pawar ha ka sngi Thohdieng ka la hiar sha East Jaiñtia Hills District, ban tohkit ïa ka jingïaid shaphrang ka jingpyntreikam ïa ki skhim bapher bapher jong ka Sorkar Pdeng.
Ka Myntri ka la ong ba ki skhim ki la treikam bha ha Meghalaya. Ka la ong ba ki don katto katne ki skhim ba la treikam bha kum ka MGNREGA ha kaba ka jingjop kalong 99 percent.
“Ha u snem ba ladep, ngi la ïoh pdiang ïa ka mang tyngka kaba T. 33 klur na ka bynta ka MGNREGA, kaba la ïarap ïa palat ki 25,000 tylli ki longiing. Mynta u snem, ngi la mang pisa katkum ka jingkiew ka jingdawa,” ka la ong.
Ka la bynrap ba ka skhim MGNREGA ka la long kaba jop ha East Jaiñtia Hills District bad ïaroh ruh ïa ki sienjam jong ka tnat.
Haba kren shaphang ka PM Awas Yojana, kaba thmu ban pynbiang iing sah ïa ki briew kiba don ha u laiñ ka jingduk, ka Myntri ka la ong ba la mang ïa ka pisa na ka bynta ki 882 tylli ki longiing. Ka la pyntip ba ki la don ki sienjam ban mang pisa shuh shuh na ka bynta ban shna ïa ki iing kiba paka.
Ka la kren ruh shaphang ka National Rural Livelihood Mission (NRLM), kaba ai jingkyrshan ïa ki briew lyngba ki Self Help Group (SHG). Ka la ong ba la ithuh ïa ki khynnah kiba duna ka bam kaba tei lyngba ki SHG na ka bynta ka jingeksamin ïa ka koit ka khiah da ka Tnat ka koit ka khiah ha ki jaka nongkyndong.
Ka Dr Pawar ka la ong shuh shuh ba ka Public Works Department (PWD) ka la mang 126 klur ha u snem 2022 ban shna ïa ka surok kaba 39 kilomitar ban pynïasoh ïa ki phra tylli ki shnong. Kane ka surok kan long ka jingmyntoi ïa ki nongshong shnong kiba sah ha ki thaiñ Khappud ka ri India bad ka ri Bangladesh bad la buh thong ban pyndep hapoh shi snem shiteng, la bynrap ka Myntri.
Ha kaba ïadei bad ki Primary Health Care (PHC) Centre, ka Myntri ka la ong ba ka jingmang pisa ka la kiew na ka T. 1,80,0000 ha u 2022 sha ka T. 2,60,0000 mynta u snem. Ka la batai ba ka Sorkar Pdeng ka la mang pisa 1,23,0000 bad 2,20,0000 na ka bynta ban pynkhlaiñ ïa ki PHC sub-centre bad ki diagnostic lab.
“Ka Pradhan Mantri Arogya Yojana, ka skhim Insurance kaba heh tam, ka ai haduh 5 lak na ka bynta ka jingai jingsumar ïa ka longiing. Haduh mynta, ki don 17,000 ngut ki briew kiba la ïoh jingmyntoi haba ki hap ïoh jingsumar kyrkieh bad ki donkam ban shah puid ha kaba ki jingmyntoi ki la kot sha palat 10 klur,” la pyntip ka Dr Pawar.
Ka la kren ruh shaphang ki sienjam jong ka Sorkar Pdeng ban pynduh jait ïa ka jingpang Tuberculosis ha ki PHC bad ki Health and Wellness Centre (HWC).
“Ngi la ai jingsumar ei ha iing lyngba ki PHC. Lyngba ki HWC, ka jingthmu jong ngi ka long ban leh Screening ïa ka jingpang Breast Cancer, Cervical Cancer, Hypertension, jingpang shini bad kiwei kiwei,” ka la ong.
Ka Myntri ka la ai khublei ïa ki bor pynïaid jong ka jylla kiba la pynkot haduh 88 percent ka jingïoh jingkoit ha ki jaka sumar.
“Ha u snem ba ladep, ka jingïoh jingkoit ha ki jaka sumar ka long 54 percent bad ka la kiew sha ka 76 percent. Mynta u snem, ka long kumba 88 percent. Ngi thmu ban pynbiang ki lad ïoh jingsumar ha kine ki jaka bad ruh ba ngin pynbiang ka jingshakri ïa kito kiba kham don ha ka jingma. Ha kaba ïadei bad ka HIV, ka thong jong ngi ka long ban pynbiang ki dawai, ai ka jingïasyllok, ki jaka test bad kiwei kiwei lyngba ki ART centre.
Ka la pyntip ruh ba ka Krishi Sanchayi Yojana ka pynbiang 3 klur sha 180 tylli ki longiing.
“Ka “PM Kisan Samman Yojana ka la ïarap ïa 10,000 ngut ki nongrep, da kaba thep T. 6,000 beit beit sha ki Bank Account jong ki,” ka la bynrap bad kren shaphang ka Jal Jeewan Mission.
“Ngi la kynthup kumba 192 tylli ki shnong. Na kane, 42 tylli ki shnong ki dei kiba la dep ïa ka kam. Ngi la pynbiang 186 klur ban pynpoi ïa ka um ba khuid sha ki briew ka Meghalaya,” ka la ong.
Kumjuh ruh, ka Sorkar Pdeng ka la ai palat 7 klur ban kyrshan ïa ki kam ri dohkha ha Meghalaya.