Khliehriat, Naiwieng 30 : Ka Dorbar Shnong Umkiang, East Jaiñtia Hills District ka ai por tang shi taïew ïa ka National Highway Authority of India ban maramot ïa ka surok national highway ha Umkiang namar ba ka jingsniew ka surok ka la long shaba palat bad buh jingeh bad buh jingma ïa ki paidbah.
La ong ruh ba na ka liang ka Dorbar Shnong ka la dep ban pyntip sha u Deputy Commissioner ka East Jaiñtia Hills District bad kumjuh ruh sha ka NHAI bad buh ruh ka jingkyntu ban maramot noh kloi ïa ka surok, hynrei ym shym la shim khia satia ïa kane ka jingkyrpad ka Dorbar Shnong bad ka NHAI ka khlem leh satia kumba ka la kular.
Kumta na ka liang ka Dorbar Shnong Umkiang kan ap kumba la ai por shi taïew bad lada ym lah ban maramot, ka shnong kan pynlong da ka jingiakhi da kaba ïa mih paidbah ha surok ha ka 3 tarik u nohprah.
“Kumba long mynta ka jingbym maramot ïa kane ka surok kaba pyniasoh ruh bad ka jylla Assam (Barak Valley), Manipur,Mizoram, Tripura bad kiwei kiwei ki jylla ka la wanrah jingeh haduh katta katta ïa ki paidbah nongleit nongwan bad buh jingma ruh ïa ka koit ka khiah jong ki paidbah khamtam ki khynnah ki khyllung, na ka daw ka jingjur palat u pum pum khyndew.
