Mar T. 1 Lak khur ka K Mandals bad Sporting Spirit kum ki lahduh ha ka Basketball ka UDP 17 North Shillong Youth Wing
Shillong, Risaw 05 : Ka lympung ïalehkai basket-ball ba la pynïaid da ka UDP 17 North Shillong Youth Wing kaba la tip kum ka UDP 17 North Shillong Men’s and Women’s Basketball Tournament 2022 ka la poi noh sha kaba kut ha ka 5 tarik Risaw 2022 ha madan ïalehkai basketball ha Jaïaw Pdeng, ha kaba ka kynhun jong ka K Mandals bad ka Sporting Spirit ki la khur ïa ka song pisa ba mar 1 lak tyngka ha ryngkat ki trophy kum ki lahduh.
Ka K Mandals ka la long ka lahduh ha ka liang ki shynrang da kaba pynliem da 59-34 ïa ka Jingthang Briew kaba ïoh 50 hajar katba ka Sporting Spirit ka la long ka lahduh ha ka liang ki kynthei hadien ba ka la pynliem noh ïa ka kynhun The Cassia kaba ïoh 50 hajar tyngka.
Ha kane ka sngi la sakhi lang ruh u Bah Paul Lyngdoh MDC ka Jaïaw kum u Kongsan, Dr. Aman War u kyrtong jong ka party UDP na 17 North Shillong Constituency, Bah Alantry, Bah Joe Marweiñ, ki nongkitkam ka UDP Seng Kmie, ki nongkitkam ka UDP 17 North Shillong Constituency, ki riew rangbah, longkmie longkpa, ki khun samla haduh ki hep kiba rit.
Ka jingïakhun phainal hapdeng kine ki saw tylli ki team ka long kaba itynnad bad shongshit khamtam ka jingwan ki paidbah nongkyrshan bad nongpeitkai kiba la pyndap smam ïa ki gallery.
Ha kaba kut la sam ruh ïa ki khusnam shimet kum ka khusnam nongthep kol ba bun tam (top scorer), ha ka liang ki shynrang ïa katei ka nam la ïoh da u Nathaniel Kharbhih (K Mandals) katba ka Caroline Kharpuri (Sporting Spirit) ha ka liang ki kynthei.
Kum ban pynkynmaw hangne ba ka UDP 17 North Shillong Youth Wing ka la la lah ban pynlong ïa kane ka tournament lyngba ka jingkyrshan u Dr. Aman War kaba la ïatreilang ryngkat ka Meghalaya Basketball Association kaba la ïarap pynbit pynbiang ïa ka prokram jingïalehkai. Ki don baroh 15 tylli ki team kiba la ïashim bynta ha katei ka tournament ba kynthup 9 jong ki shynrang bad 6 tylli jong ki kynthei.
La sdang ïa katei ka tournament ha ka 1 tarik Risaw ha kaba ha ka 5 tarik Risaw u Bah Paul Lyngdoh u la pynbna syndon ba kane ka lympung ka la poi noh sha kaba kut.