Mano na kine ki MDC ha KHADC kiban wan phai biang bad mano ban shah pynshongthait noh ha ka 21-02-2025

Haduh 10 ngut ki MDC bym mih aireng shuh

0

Shillong, K’Lyngkot 19 : Ka elekshon MDC ha Khasi Hills Autonomous District Council (KHADC) kaban long ha ka 21tarik Rymphang 2025 kan dei ka rai ba khatduh na bynta ki paidbah jong ki 29 tylli ki constituency ban jied biang da ki juh lane ban jied thymmai noh ïa ki MDC jong ki.
Tangba ha kane ka kynti ba mynta la sakhi ruh ba kadei ka elekshon kaba kham phylla tam naba ki don bun bha ki MDC kiba la shongthait noh na ka kam elekshon da kaba ailad noh ïakiwei pat bad don ruh kiba la khlad noh na kane ka pyrthei.
Ym tang katta ki don bun bha ki MDC kiba la kylliang noh ka uniphom na kaba ki don baroh shi katta da kaba leit ban ïakhun noh na kawei ka party ne rai ban ïakhun noh kum ki kyrtong shimet.
Lada sdang na Ri Bhoi District kaba don san tylli ki constituency la sakhi ba tang saw ngut ki MDC kiba mih ban aireng biang hadien ba u MDC ka Mawhati Bah Charles Marngar uba dei ruh u MLA ka thain mynta u la rai ban kynran dien noh bad ailad noh ïa uwei.
Kine ki MDC kiban aireng biang ki kynthup ïa u Bah Victor Ranee kyrtong ka Congress na Jirang, Bah Balajied Ranee kyrtong ka UDP na Nongpoh, Kong Macdalyne Sawkmie Mawlong na Umsning bad Bah Rangkynsai Kharbuki kyrtong ka NPP na Umroi.
Na East Khasi Hills pat kaba don 17 tylli ki constituency, katkum ki khubor ba la ïoh lum haduh mynta haduh hynriew ngut ki MDC kin ym ïakhun shuh. Arngut na kine ki dei ki CEM barim, kata u MDC Shella Bah Teinwell Dkhar bad Bah Latiplang Kharkongor MDC ka Nongthymmai kiba la khlad noh dang shen. Katba ki saw ngut kiwei pat ki MDC kiba la kynran dien noh ki kynthup ïa u MLA bad Myntri ba mynta ka Sorkar Jylla Bah Paul Lyngdoh na Jaïaw, Bah Sherborlang Mawlong MDC na Sohiong, Bah Ronnie V Lyngdoh MLA ba mynta bad MDC na Mylliem bad Bah Martle N Mukhim u MDC na Mawkynrew
Lada ïaid katkum ki constituency na Sohryngkham kaba mihkhmat da u Bah Pynïaid Sing Syiem ba dei ruh u CEM mynta la mih bujli da uwei pat u kyrtong hadien ba une urangbah u la jied ban leit ïakhun noh na Nongthymmai.
Kumta kiwei ki MDC kiba dang pynkhreh ban aireng biang ki kynthup ïa u Bah Lambor Malngiang kum u kyrtong shimet na Nongkrem, Bah Ryngkatlang Lyndem kyrtong UDP na Langkyrdem Laitkroh, Kong Grace Mary Kharpuri kyrtong ka NPP na Nongshken, Bah Alvin Khyriem Sawkmie kyrtong ka NPP na Mawsynram, Bah Titos W Chyne kyrtong ka UDP na Sohra, Bah Mitchel Wankhar kyrtong ka UDP na Laban Mawprem, Bah Fantin Joseph Lakadong kyrtong ka NPP na Laitumkhrah Malki bad Bah Pynshngain N Syiem kyrtong ka Congress na Mawkhar Pynthorumkhrah.
Nangta u Bah Teibor Pathaw uba la rai ban ïakhun kum u kyrtong shimet na Mawlai bad u Bah Lamphrang Blah kyrtong ka NPP na Mawphlang Diengiei.
Ha Eastern West bad West Khasi Hills kaba don san ngut ki MDC hynrei kiba mih ban aireng biang ki long sa tang arngut, kata tang u Bah Batskhem Ryntathiang kyrtong ka NPP na Mairang Nongkhlaw bad u Bah Jambor War kyrtong ka UDP na Pariong Mawthadraishan.
Katba ki lai ngut kiwei pat kiba la kynran dien noh ki kynthup ïa u MDC ka Nongstoin Bah Gabriel Wahlang ba dei ruh u MLA ka thaiñ, nangta u Bah Bajop Pyngrope MDC ka Rambrai Jyrngam bad Bah Gigur Myrthong MDC ka Mawshynrut.
Ha South West Khasi Hills pat kiban aireng biang ki kynthup ïa u Bah Carnes Sohshang kyrtong ka NPP na Mawkyrwat bad u Bah Pius Marwein MLA bad kyrtong ka UDP na Langrin constituency.

Leave A Reply

Your email address will not be published.