Shillong: Ka Child Friendly Shillong ka project kaba hap hapoh ka jingpeit jong ka Bosco Integrated Development Society (BIDS) bad ka skul jong ka Social Work na ka skulbah Martin Luther Christian University ka ïatreilang ban ïa kyntiew ïa ka roi ka par ki khynnah halor ka phang, “Who can protect me, I and We” kaba mut ‘Mano ban ïada ïa nga, Ma nga bad Ma ngi’. Ka jingthmu jong kane ka phang ka long ban pynsaphriang bad pynhikai ïa ki lad ki rukom ïada ïalade hapdeng ki khynnah bad katto katne ki longkmie hapdeng ki jingsniew jong kane ka pyrthei.
Ha kine ki sngi ba mynta, ngi ïohi bun ki jingeh ba ki khynnah ki ïa kynduh kum ka jingshah ban beiñ ki khynnah khyllung, ka jingïoh khun khynnah, ka jingleit trei bylla ne wad bylla, ki jingshah pynshoi ha ki paralok, ka jingngop noh ha ki jingdih buiad bapher bapher, ka jingshah leh heh para khynnah (bullying) kaba ktah shaduh ka jingmut jingpyrkhat bad kumta ter ter.
Bunsien la shem ba ki khynnah kiba la ngop bha ha kine ki jingsniew ne ki jingshah leh bymman, la ka long ha ka liang ka met ka phad, ka shongkha jubor/ bat bor, ka jingshah leh heh para khynnah, ka ktah ïa ka pyrkhat pyrdaiñ, ka pule ka puthi, ka jingïadei ha ïing hasem bad ki paralok ba ïajan, bad don ki por ba ka poi ha u pud ba ki rai ban bthat noh wat ïa la ka jong ka jingim. Te kumta, namar ngi tip ba ki khynnah ha kine ki sngi ki bun ki jingeh ba ki ïakynduh te kaei ba ngi lah ban leh kum kiba lah heh la san, ki kmie ki kpa, ki nonghikai, nongïalam shnong, nongïalam niam bad kumta ter ter.
Namar la jan baroh ki khynnah ki don la ki kmie ki kpa ne ki bahaing bahasem, lehse donkam ban pynkhlaiñ ïa ka jingïadei bad ki khun ki kti. Ka jingïadei shikmie shikpa bad shikhun ka ïapher bha na kiwei pat ki jingïadei ha iing ha sem. Ka jinglong kmie ne kpa ka kham khia bad ka don ka jingkitkhlieh haba ïa nujor bad kiwei pat ki jingkitkhlieh ha ka jingim jong i Khynnah. Ki dei ki nongri nonsumar kiba nyngkong eh, nongpeit, nonghikai ïa ki khun ha baroh ka liang kum ka akor ka burom, ban long shlur bad burom ïalade bad kumta ter ter. Hynrei ha kine ki sngi kiba mynta, ki sngi bunkam ha kaba bun na ngi, ngi bunkam ban beh ïa ki kam ki jam, ki kmie ki kpa ki duh noh ïa kane ka lad ban sumar bad pyllut por bad ki. Donkam ruh ban sngewthuh ïa ka jinglong jingman jong ki khynnah ha ka rukom pyrkhat pyrdain ka jong ki, ka jingkylla ka met ka phad, ka jingsngewthuh ïa ki kam ba ki sngewtynnad bad kumta ter ter.
Ki jait rukom ba ngi lah ban ïarap ïa ki khynnah kum kiba la heh la san ki long: lehse ngi lah ban sngap ïa ki ïa kaei ba ki ïakynduh ki shem ne ïakynduh khlem da don ka jingbishar ïa ka jingim ne jingshem jong ki, ki kmie ki kpa kin hap ban sdang ban tei ïa ki jingïakren man ka sngi bad la ki khun ki kti. Ngi lah ban ai jinghikai ïa ki kumno ba kin ïada ïalade ban lait na kita ki jingeh bad ban hikai ïa ki ban ïarap ba kin lah ban shim ka rai kaba bha na ka bynta ka jingim lade. Ngi hap ban ïa pyrshang ruh ban pyllut por wat ha ka jingmareh jong ka jingbunkam da kaba ïashongkai, ïalehkai ne ïalam kai ïa ki. Kane ka dei kawei ha kaba ki khynnah kin don ka jingsngew ïa jan bad ki nongpeit nongsumar. Da kaba leh kumne kan ai mynsiem ïa ki khun ban lait na ki jingsniew namar kin wan ban ïathuh bad kum ki nongpeit nongsumar ngi lah ban ai jingïarap jinghikai halor kata. Kumjuh ruh, ki khynnah kin lait na ka jingkhuslai jingmut jingpyrkhat bad kane ka ïalam sha ka jingshlur bad ka jingshemphang jong ki khun ha ki liang baroh. Baroh ki khynnah ki donkam ïa ki jingsneng jingkraw bad ki jinghikai ba bha jong ka jingim. Ha kajuh ka por ruh kum ki kmie ki kpa hateng hateng ki dei ban ïashim bynta ha ki prokram kiba pynlong ha ki shnong kiba ïadei bad ki lad pynheh-pynsan ïa ki khyllung- khynnah bad kiwei kiwei.
Ngi im ha ka jingim jong ka teknoloji bad sngewthuh ruh ba ka long kaba donkam ha ki sngi kiba mynta. Naduh ki barit haduh kiba la san ki sngewtynnad bad donkam ïa ka mobile phone. Hooid, ka long kaba donkam bad ha kajuh ka por ruh ki jingma ki ap. Bunsien ngi ïohi ba ki khynnah rit dang shisnem ne arsnem ki lah bat ïa ka mobile phone bad bun na ki nongpeit nongsumar ym lah ban buddien ïa ki Site aiu ba ki leit, hynrei shu sngewsarong ba ki khun rit jong ngi ki nang ban leh mobile phone ne hateng ym pushe. Ki jingwadbniah kylleng ka pyrthei ki paw ba ki jingma ki long kiba bun lada ki khynnah rit ki pynlut por bun kynta ha kaba peit bad khmih ïa ka mobile. Ha ki khynnah samla rit pat, naduh ka por COVID la shem ba baroh ki la don la ka jong ka mobile phone namarba hap shong Online klas. Kaba sngewsih pat bun na ki nongpeit nongsumar ki shaniah ba ki leh kumta bad dei na kane ba bun na ki khynnah ki shah lam bakla bad ïakynduh bun ki jingeh. Lehse ngi kum ki nongpeit nongsumar ngi lah ban husiar ne khmih lang bad ki ïa kaei ba ki leh katba ngi lah toi.
Ki nonghikai ki dei kiwei ki atiar kiba lah ban ïada ïa ki khynnah lyngba ki jinghikai ki jong ki ïa ka Lifeskills Education kaba ïathuh bad hikai shaphang ka rukom ïada ïalade la da don ha kano kano ka khep ban lait na ka jingshah pynshoi ne ban lah ban shim ïa ka rai na ka bynta ka jingbha ïalade. Ka Child Friendly Organization ka dei kawei na ki Organaiztion kaba ai jinghikai ïa ki khynnah halor kane. Kiwei pat ki jait jinghikai kaba donkam ban ai ïa ki khynnah ki long ka Career Skills Education kaba lah ban pyni ïa ki jait jingpule ne ki jait kam ba ki lah ban trei khnang ba ki khynnah kin don la ki jong ki thong ba bha na ka bynta ka lawei ka jong ki. Ïa kine ki prokram lah ruh ban hikai ha ki shnong ki thaw, ki jaka niam bad kiwei kiwei.
Da kaba lah ban hikai bad ïatreilang, ngi ngeit ba u ne ka khynnah ki lah ban ïada ïalade bad kata hi ka dei ka jingthmu jong kane ka campaign “Who can protect me, I and We”, Mano ban ïada ïa nga, Ma nga bad Ma ngi.
(Ïa kane ka jingthoh la thoh da: Banteibok Thongney, Nazareen Shabong, Priyanka Jat, Avana Liza Suting, MSW bad Dr. Marbabiang Syiemlieh, Faculty, School of Social Work, MLCU)
