Mang ka Sorkar kumba 538 klur tam na ka bynta ka New Shillong Water Supply Scheme Phase-1

Shillong, Nailar 27: Ka pisa kumba T 538.44 klur la dep ban mang hapoh ka State Plan na ka bynta ban pyntreikam ïa ka New Shillong Water Supply Scheme Phase-I.
Ïa kane ka project la mang na ka bynta ban pynïaid ïa ki kam ki jam kaba la pyllait ha ka 15 tarik u Lber mynta u snem.
Ïa ka EPC contract la aiti sha ka M/s BAC Infratech Private Limited ha u bnai Jylliew, 2024 bad kane ka project mynta ka la don ha ka jingsdang ïa ka kam.
Ha kawei pat ka liang ka sorkar jylla kam pat mang satia na ka bynta ka New Shillong Water Supply Scheme Phase-II, kaba la tyrwa ha ka jinglut kaba long T. 1,111.56 klur.
Ïa kane la ïathuh da u Myntri ka tnat Public Health Engineering (PHE) u Marcuise N Marak haba jubab ïa ka call attention notice ba la wanrah da u MLA ka liang pyrshah uba dei ruh na ka seng VPP u Bah Heaving Stone Kharpran hapoh Dorbar Synrai ha ka sngi baar.
U la ong ba ka phase-I jong ka project ka dei ïa ki jingtei kiba heh kum ka jingtei ïa ka dam, 2 tylli ki jack well bad ka pump house hajrong ka pung bad ki jingtei jong ka stage I & II pumping system, power station, pumping main, ka jingshna ïa ka water treatment plant, ka clear water sump bad kiwei pat ki jaitkam.
Ka contract na ka bynta ka kam jingtei jong ka jingsam um na ka bynta ka New Shillong Township (Phase-I) kadei ka EPC (Engineering, Procurement & Construction) contract ha kaba ka kam ka kynthup ïa ka jingjurip, ka jingtohkit, ka jingpynwan dur bad kiwei kiwei.
Halor ka jingdawa ban ai ïa ka kam sha ki kontraktor jong ka jylla, u Myntri u la ong ba khnang ba ka jingtei kan long katkum ka juk kaba mynta bad kaba bha baroh ki kam hapoh ka Phase I jong ka project yn pynïeng da ka SCADA (Supervisory Control and Data Acquisition)/IoT (Internet of Things) system.
Ïa ka SCADA control system yn tei na ka tyllong um jong ka water treatment plant kaba don bad ka LAN (Local Area Network). U Contractor un hap ban ïatreilang bad ki rukom pynïaid kam ka SCADA ka ban peit ruh ïa ka jingpei ki pipe um bad kiwei.
Shuh shuh na ka liang u Myntri u la ong ba na ka bynta ka Phase-II jong ka project ym pat ïoh ïa ka jingmang pisa.
U la ong ba ka New Shillong Water Supply Project la dep ban pynwan dur ïa baroh kawei ka kam jong baroh artylli kata ka Phasi-I & Phase-II.