Baghmara, Lber 4: Ka Baghmara Civil Hospital kaba don ha South Garo Hills, kaba dei tang ma ka, ka jaka sumar jong ka sorkar ha ka District kala treikam mynta la bun bun snem bad shen yn nang pynkhlaiñ ïa kane ka jaka ai jingsumar da kaba yn tei shuh shuh ïa ka hospital ka ban ngiam sa 150 tylli ki jingthiah. ïa kane la mang tyngka da ka tnad DoNER 15 klur tyngka, pyntip u Myntri Rangbah ka jylla u Conrad K Sangma.
U Myntri Rangbah ula pynbna ïa katei mynta ka Lah Sngi U Blei ha ka jingplie ïa ka Academic Block bathymmai bad ia ka Hostel ki kynthei bad hostel ki shynrang jongka Captain Williamson Memorial Government College.
Haba ai jingithuh ïa ka jingdonkam ban pynïar ïa ka jingtei bad ki jingdonkam ha Baghmara ha kaba ki nongpang kiba wan na jngai kum na Maheskola, Mahadeo, Rongara bad Siju kin ïoh ïa ka jingsumar, u Conrad Sangma ula ong, ba ka sorkar ka tyrwa ban buh sa 150 tylli ki jingthiah lyngba ka Projek kaba thymmai.
“Ngi lah dep ban aiti ïa ka jingtyrwa sha ka DONER Ministry ha ka jinglut jingsep ka ban kot T.15 Klur na ka bynta ban kyntiew ïa ka Baghmara Civil Hospital khnang ban don sa 150 jingthiah” ong u Myntri Rangbah.
Katkum ka jingtyrwa, u Myntri Rangbah ula pyntip ban mang sa T.5 Klur na ka bhah tyngka jong ka jylla na ka bynta ban tei ïa ka jaka sah jong ki doctor, nurses bad ki nongtrei ha ka Hospital.
Ula pynpaw ba ka lah ban don ka jingslem na ka liang ka DONER Ministry ban pynbna ïa katei ka projek namar ban long ka elekshon hapoh ka ri bad ula pynpaw ïa ka jingkyrmen ba katei ka projek kan sdang ha u snem 2025.
