Maitphang u Lat ïa ki thong treikam ka sorkar MDA ha ka sngi ba sdang ka Dorbar Mang Tyngka

Shillong, Rymphang 16 : U Lat ka Jylla Phagu Chauhan mynta ka sngi Thohdieng, ula ong ba ka Sorkar Jylla kala buh ïa ka thong ba angnud ban pynlong ïa ka Jylla Meghalaya ka 10 billion US dollar economy hapoh u 2028, ka ban kyntiew arshah laishah ïa ka GDP jong ka Jylla.
“Ki kam kum ha ki jingtei, ka bording, ka jingsam umbam, ka jingpynshlur ïa ki jingseng kam, ka IT, ka kam jngoh kai bad ka rep ka riang kin dei ki kam kiban kyntiew ïa ka ïoh ka kot bad kaba donkam ban kynjoh ïa kata ka thong” ong u Chauhan haba ai jingkren da ka Hindi ha ka sngi sdang jong ka Dorbar Mang Tyngka ka Jylla.
Haba kren halor ki Policy jong ka Sorkar MDA, u Lat ula ong ba ka Jylla ka kwah ban kyntiew arshah ïa ka kamai ka kajih jong ki nongrep da kaba shim kabu ïa ka jinglong ka suiñbneng kaba pher hangne bad da kaba pynkhlaiñ ban wanrah ïa ki lad ban pynmih ruh ïa kiwei kiwei ki mar bam na ki marrep ba ki pynmih.
Halor kane, ka Sorkar ka la buh hakhmat eh ïa ki sienjam ban kyrshan ïa ki nongrep ba rep ïa ki mar ba shongdor bha kum u shynrai, sying, sohniamtra, sohtrun, ki kynbat, ki musla bad ka ngap da ka mission mode. Hapoh kine ki Mission, ki nongrep ki la ïoh ïa ki tiar rep, jinghikai, ki jingtei ban shna ïa ki jaka pynmih mar na ki marrep bad ka jingpynïasoh ïa ka ïew ka hat. Haduh mynta, kine ki Mission kila ïarap haduh 13 ngut ki nongrep ban kyntiew ïa ka kamai ka kajih jong ki.
U Chauhan ula pyntip ba ka Sorkar kala kynshew pisa bun bha ha ka kam ri jingri ban pynim ja ïa ki paidbah ha Nongkyndong bad ban pynkhlaiñ ïa ka jingpynmih dud bad ka doh ban bam.
U ong, ka Sorkar hapoh ka CM-Elevate ka la ai 50% ka subsidy ïa ki unit ban buh sem sniang, ri blang bad ri syiar. Hapoh ka Piggery Mission, haduh 367 tylli ki cooperative society la dep ban thaw bad kiba la ri mynta ïa palat 6000 tylli ki sniang kha khun. Palat 1000 ngut ki nongrep ba pynmih dud kila ïoh ïa ka ram ba khlem sut na ka Meghalaya Milk Mission.
Haba pynpaw ba ka jingpynmih dohkha ha Jylla kala kiew da 1139 metric ton ha u 2023 kaba la kynjoh mynta haduh 19,374 metric ton, u Lat ula ong baka Jylla kala nang jam sha u pud ban pynduna ïa ka jingwanrah dohkha na shabar ka Jylla da kaba wanrah ïa ki jaka pynkha pylleng kum ka Recirculatory Aquaculture System bad Integrated Cage Culture.
Haba phai sha ka koit ka khiah, u Chauhan ula ong ba ki dak ki shin na ki jaka sumar ka Sorkar kila pyni ïa ka jingjanai ha ka rukom ai jingsumar ha kine ki khyndiat snem bala leit. Ka Jylla ka la sakhi ïa 50% ka jingduna ha ka jingiap jong ki longkmie ba kha khun da ka jingwanrah ka Sorkar ïa ka Chief Minister’s Safe Motherhood Scheme.
U Lat ula ong ruh baka jingpynkhlaiñ ïa ka jingdon ki nongai jingsumar ha Jylla, ka Medical Recruitment Board ka la dep thungkam haduh 47% ïa ki doktor tang hapoh ka shisnem. Ka Sorkar ka la pynlut palat ïa ka T.6 klur lyngba ki 6500 tylli ki Village Health Council ban pynkhlaiñ ïa ki lad ai jingsumar ha ki shnong ki thaw da ka jingïatrei ryngkat bad ki Dorbar Shnong.
Haba ban jur ba ka Sorkar ka dang don ïa ka jingmut kaba skhem ban pynïoh ïa ka pule ka dangle kaba kynsai ha baroh ki kyrdan, u Lat ka Jylla ula ong ba ka Sorkar mynta ka dang kyntiew kyrdan bad shna pynbna ïa baroh ki ïingskul kiba don hapoh ka Jylla.
“208 tylli ki Elementary, Secondary bad Higher Secondary school kila ïaid hapoh ka Phase-I. 111 tylli ki skul kin hap hapoh ka Phase-II bad sa 1725 tylli kin hap ha ka Phase-III. Ka kam thungkam ïa ki nonghikai skul LP bala sahteng la slem bah ruh ka dei kaba la dep ban leh mynta dang shen” ula ong haba bynrap ba haduh 996 ngut ki nonghikai ba dang thungkam thymmai kila ïoh ïa ki shithi thungkam ha ka prokram kaba long ha Tura bad Shillong.
Ha ka liang ka Higher Education, ula ong ba ka Sorkar kala plie ïa ka Shillong Government College of Engineering ha u snem bala lah bad kan sdang noh shen ban pdiang noh ïa ki samla pule. “Ka College of Architecture bad Urban Planning ha Tura ruh kan sa dep noh mynta u snem. Ka Sorkar ka la pynkylla ïa ka Captain Williamson Sangma Technical University Act ban pynkylla sha ka State University khnang ba ki College ka Jylla ki lah ban pynïasoh. Kane kan dei ka State University ba nyngkong eh ha Jylla Meghalaya” ula ong.
Haba kren ïa ka lad aikam aijam, u Lat ula ong ba ka Sorkar ka angnud ban ai jinghikai pyntbit ïa 1.5 lak ngut ki samla ha ki sap ïohkam kaba ki don ha kine ki 5 snem ban wan lyngba ka Skill Meghalaya Programme. Dang shen kala ïaid ka jingai jinghikai pyntbit ïa ki nos ki ban sa ïohkam ha ki ri ba riewspah ka pyrthei kum ka Japan, Singapore bad ka United Kingdon.
Haduh 74% ki ïing ha Meghalaya kila ïoh kor um ïing.
U Lat ula pyntip ba haduh mynta 4.8 lak tylli ki longïing ka Jylla kila ïoh ïa ka kor um ïing lyngba ka Jal Jeevan Mission, kaba kot haduh 74% ka jingtreikam bad kaba long halor ka national average.
U ïathuh ba nalor ki longïing, haduh 66% ki skul, 66% ki Anganwadi Centre bad 71 % ki PHC kila ïoh ïa ka umbam umdih na ka Sorkar Jylla. Palat 1000 tylli ki Shnong ha Jylla kila ïoh syrnot kum ki “Har Ghar Jal’. Haduh 5467 tylli ki Shnong ki dei kiba la ithuh kum ki shnong bym leit painkhana shuh sharud shakiar hapoh ka Swachh Bharat Mission (Gramin) Program. Ka Sorkar ka buh ïa ka thong ban pynlong ïa baroh ki Shnong ka Jylla kum ki shnong ki bym leit painkhana shuh sha khlaw sha btap ne sha rud sha kiar hapoh une u snem ba mynta.
Nalor kane, u Chauhan ula ong ba ka Sorkar kala shim ruh ïa shibun ki sienjam ban pynheh ïa ki kad liengsuiñ kiba don ha Jylla. U ong ba ka Shillong ka dei kaba la pynïasoh liengsuiñ mynta haduh 8 tylli ki Sorbah jong ka Ri India.
Halor ka rai jong ka Sorkar ban tei noh ïa ka New Shillong Township, u Chauhan ula ong ba kane hi kan ïaid ha ki artylli ki bynta. Ka bynta ba nyngkong ka long ban tei ïa ka Administrative City ha Mawdiangdiang bad kaba ar pat ka dei ka jingtei ïa ka Knowledge City ha Mawkhanu kaba dang ïaid mynta ha ka jingïaphylliew jingmut.
Kum shibynta na ka plan ban pynbiang ïa ki lad pynïasoh jong ka New Shillong, ka Sorkar kala shna mynta ïa 3 tylli ki surok ba pynïasoh ïa ka New Shillong, sor Shillong bad ka Shillong Bypass. Kum kane kajuh ka plan la pynkhreh ruh mynta ïa ka Tura bad Jowai.