Nongstoiñ, Ïaiong 22: Namar ka jingjia pluh jong kawei ka ïing kaba don ha ka shnong Moronga Nengkram, East Garo Hills kaba la pluh kynsan ha ka sngi ba ar, ki pulit ki la ong ba ka jingpluh ka jia namar ka jingbym biang ïa ka rukom pynïaid ïa ki waïar bording bad kam dei kaba leh dusmon da kino kino ki briew.
U Superintendent of Police jong ka East Garo Hills Bah Stephen Rynjah, u la pyntip ba hynne ka sngi ba ar, ha ka por 12 baje mynsngi, ka Mangsang Outpost ka la ïoh ïa ki jingtip ba ka la don ka jingpluh kawei ka ïing jong ka Presila N. Marak kaba na ka shnong Morongga Nengkram, ka jaka kaba hap ha ka jingkhmih jong ka Rongjeng Police Station. Mar mar kumta hi ka Fire and Emergency Service Station, Rongjeng ka la leit mardor sha katei ka jaka ban pynlip ïa kane ka ding.
U Bah Stephen u la kren shai ba ki pulit ki la lap ba kam shym la don kano kano ka jingleh sniew da kino kino ki briew bad ym shim la don briew ruh hapoh katei ka ïing ha ka por ba jia ka jingkem ding.
U la ong ruh ba la shem ba katei ka jingpluh ka dei namar ka jingdon ka jingthud ha ka bording elektrik, namar ka jingbym biang ka rukom pynïaid ïa ki waïar bad kam shym la don satia kano kano ka jingleh sniew.
Na ka liang u SP u la maham ruh, ba lada tip ne lap ïa kino kino kiba shim kabu ïa katei ka jingjia da ka jingthmu ban pynthud ïa ka shongsuk shongsaiñ bad ban wanrah ïa ka jingsngewpher jaidbynriew, ki Pulit kin leh da kaba tyngeh pyrshah ïa ki.
