Nongstoiñ, Nohprah 6: U Superintendent of Police ka West Khasi Hills u la pyntip paidbah bad bthah ïa baroh ki nongshong shnong, ba kin long kiba adkar bad leh khuid ha ki jaka paidbah, ki lynti syngkieng, ki surok bad ki jaka jngoh kai pyrthei kiba don hapoh ka District. Ban kiar na ka jingleh kulmar, pynmynsaw ne pynthut ïa ki nongleit nong wan lane ban pynjaboh bad kren ki ktien jakhlia ne hylla ha ki surok bad jaka jngoh kai kiba don hapoh ka West Khasi Hills District.
Kino kino kiba pynkhein bad bym kohnguh ïa kane ka hukum ba la pynmih, ki lah ban shah kem bad shah set patok hapoh ka kyndon U/S 102 of the Meghalaya Police Act, 2010 bad ki lah ban shah daiñ kuna ruh 5000 (San hajar tyngka).
Baroh ki nong wan jngoh kai pyrthei ne ki tourist kiba wan sha ki tourist spot, la bthah ba kin wanrah la ki jong ki jong ki pla hapoh ki kali jong ki ban pyndonkam ban lum ïa ki ñiut kum ki plastic, ki bitor um, ki plastic chips bad kiwei kiwei da kaba kin pyntikna ba ki la bret bha ha ki jaka buh ñiut ba la buh kyrpang.
