Shillong, Naitung 28: Ka bor pynïaid district jong ka South West Garo Hill ki la pynlong ban leh ïa ka registration kyrteng kaba donkam ïa baroh ki jaka ba ksam um kum ka bore well bad tube well kiba treikam hapoh ka district kum shi bynta ban pynbeit ia ka jingtih ïa ka um napoh khyndew.
Kane ka jingbthah, kaba la pynmih da ka District Level Committee on Ground Water Resource (DLCGWR), ka thmu ban pynbeit ïa ki kam tih ne ksam um bad ban pynthikna ïa ka jingpynïaid katkum ka stad saïan bad kaba nym ktah ïa ki marpoh khyndew hapdeng ka jingsngewkhia kaba nang kiew halor ka jingtih ba khlem da peitngor.
Hapoh katei ka hukum, baroh ki trai bad ki nongpyniaid ïa ki jingksam um ne drilling ki dei ban pynrung kyrteng ïa ki tiar jong ki ha ka ophis jong u Executive Engineer (Water Resources), South West Garo Hills Division, Ampati.
Ki dei ban ai ïa ki jingtip ba bniah shaphang ka jaka ksam um, ki jingtip shaphang ka jinglong trai bad nongpyniaid, ki jingtip ba ïadei bad ka jingstad, ki kot pynshisha ne syrnod, bad kiwei kiwei ki kot ki sla ba la bthah da ka bor ba dei peit.
Ka bor pynïaid district ki la ong ba kane ka jingpynrung kyrteng kan ïarap ban thaw ïa ka thup jingtip kaba bniah jong ki jaka ksam um bad ban pynkhlain ïa ka jingpeit bniah ïa ka jingshna ïa ki pung um ha kylleng ka distrik.
Ki heh ophisar ki la maham ba ka bym kohnguh ïa ka kyndon ba donkam ban pynrung kyrteng ki lah ban shah pynngat ha ka aiñ kaba tyngeh katkum ki aiñ kiba treikam.
Ïa kane ka jingpynbna la pynmih hapoh ka bor jong u Deputy Commissioner-cum-Chairman jong ka District Level Committee on Ground Water Resource, South West Garo Hills, ha kaba la kyntu ïa baroh ki trai bad ki nongpynïaid ïa ki jingksam um ba kin pyndep ïa ka jingpynrung kyrteng khlem da pynslem shuh.
