Shillong, Naiwieng 10: Ka sorkar jylla ka la maham tyngeh hapoh ka Geographical Indications of Goods (Registration and Protection) Act 1999 pyrshah ïa ki riew shimet bad ki karkhana kiba donkti ban thung ne ban pynïaid ïew beaiñ ïa u shynrai Lakadong (turmeric) shabar na ki jaka ne thaiñ kiba la kdew katkum ki jaka ba la buh ban pyndonkam.
Lah ban ong ba u shynrai Lakadong uba la pawnam bha u la ïoh ïa ka Geographical Indication (GI) tag ha u Lber 2024, kaba la buh ba dei ban pynmih tang hapoh East bad West Jaiñtia Hills district. Ïa kane ka jingïoh ïa ka syrnot kaba 741, la ai sha ka Lakadong Turmeric Cooperative Union Limited ha Jowai.
Ha ka hukum ba la pynmih ha ka 30 tarik u Risaw, na ka liang u Vijay Kumar, Commissioner and Secretary of Meghalaya Agriculture and Farmers Welfare Department, u la ong ba ka jingthung ïa u shynrai Lakadong shabar na ka jaka ba la buh hapoh ka Gi Tag ban pynïaid ïew bad ban die ïa u shynrai ‘Lakadong Turmeric’ ka long kaba beaiñ.
Katkum ka hukum, ka tnat Agriculture ka la lap ba ki la don ki jingjia ba ka la don ka jingthung ïa une u shynrai shabar jong ka jylla Meghalaya ha kaba la ai kyrdan beaiñ ïa u shynrai Lakadong.
La ong ba kum kine ki kam leh bakla ki la pynlong ïa ki nongthied ba kin kulmar jingmut bad kane ruh ka la pynsniew dur ïa ka jingpynmih ïa une u jait jingthung, ka jinglong jong u bad ka jinglong ba kyrpang jong u shynrai Lakadong kaba la lam sha ka jingduhnong jong ki nongrep jong ka jylla.
Kane ka hukum ka la ong ruh ba tang ki registered proprietor bad ki nongpyndonkam kiba la ïohbor kumba la batai hapoh ka Chapter 1, Section 2 Sub Section 1 (n) bad 1 (b) jong ka Geographical Indications of Goods (Registration and Protection) Act 1999 ba ki don ka hok ban pyndonkam ïa ka GI tag jong u shynrai Lakadong.
“Ka jingthung ïa u shynrai Lakadong shabar na ka jaka ba la buh bad ban pynïaid ïew ïa u yn kheiñ ba ka dei kaba pynkheiñ ïa ki kyndon kumba la batai hapoh ka Section 22.1 bad 22.3 jong ka Act,” bynrap ka hukum.
Ka la ong ruh ba kan sa don ka jingshim kam pyrshah ïa ki briew ne ki nongpynkheiñ lada shem ba ki la pynkheiñ ïa ki jingbatai hapoh ki kyndon Section 38, 39, 40 jong ka Act.
Ïa u shynrai Lakadong uba la thung bad rep hapoh ka thaiñ Lakadong jong ka Jaiñtia Hills la ïoh ka jingithuh kum uwei na ki jingthung kiba bha tam. La ong ruh ba ïa u shynrai Lakadong la thung khlem da pyndonkam ïa ki dawai sboh. Kumba long haduh mynta ki la don haduh 14,000 ngut ki nongrep ha kylleng ki 43 tylli ki shnong hapoh ka thaiñ Lakadong bad ka jingrep ïa une u jait jingthung ka la long hapoh ka jaka kaba heh haduh 1,753 hectare.
Na ka liang u Registrar jong ka GI ha Chennai u la ai khusnam da ka GI tag number 741 ïa u shynrai Lakadong ba la pynmih ha East Jaiñtia Hills bad West Jaiñtia Hills district ha kaba ïa kane ka khusnam ne jingpynkup burom la aiti ha ka 29 tarik u Naiwieng, 2023.
Ka jingaplai ban ïoh ïa ka GI tag la leh da ka Lakadong Turmeric Cooperative Union Limited, Jowai bad kaba la ïarap ban pynsuk pat da ka Directorate of Horticulture, Department of Agriculture and Farmers Welfare.
Kane ka jingai ïa ka kyrdan GI ka long ban ïada ïa ki rukom rep tynrai naduh hyndai hynthai ïa u shynrai Lakadong da kaba pynthikna ba tang ki nongrep bad kiba thung ïa une u shynrai bad ha ki jaka ba la buh ne geographical area, ki lah ban pyndonkam ïa ka GI tag.
