Shillong, Risaw, 14 : Ka Kur Lyngdoh Nonglyngkien, Maharam Syiemship, South West Khasi Hills District kaba long kawei na ki San Lyngdoh kiba la seng ïa ka Hima Maharam, ha ka Dorbar Kur kaba la long ha ïing jong i Kong Prial Lyngdoh Nonglyngkien hapoh jong ka shnong Nonglyngkien, Mawkyrwat ha ka 8 tarik, Nailur, 2023 da kawei ka sur ka la maham tyngeh ïa kino kino kiba shu kam ne ai jait da kumwei kin hap ban jubab hakhmat ka Dorbar Kur ne kin shah pynshitom katkum ki kyndon aiñ jong ka Kur.
U Kyrwoh ba la phah da u Secretary Dorbar Kur ka Kur Lyngdoh Nonglyngkien U Bah Ïalamlin Lyngdoh Nonglyngkien u la ong, “da kawei ka sur la shim ïa ka rai ba baroh kawei ka Kur kaba mih na kajuh ka kpoh jong ka Mei Ïawbei Wankitkhoh bad u Pa Thawlang Pnan Mylliem naduh kane ka sngi ki dei ban da thoh shai ha baroh ki kot ki sla ba donkam lane hangno hangno ba donkam ban thoh ïa ka jait dei ban thoh Lyngdoh Nonglyngkien. Kane ka rai ka long hadien ba bun na ki kur kiba don ha kylleng ka Bri u Hynñiewtrep kim thoh shai ne thoh lyngkot tang Lyngdoh. Kumba khnang ba kan ym don kano kano ka jingbakla ne kulmar hadien habud, ka kur ka la shim ïa kane ka sienjam.”
“Ha kajuh ka por la kyrpad ïa baroh ki kur kiba donkam ïa ki Sertiphiket ban pynshisha na ka kur (Clan Certificate) kin sngewbha ban ïa kynduh ne lah ban shu telephone ïa ki Rangbah kur,” ong u kyrwoh na ka Kur.
