Maham ka DS Pamra Kmai ïa kiba kiba pynsniew ïa ki pud ki sam kiba ha khlaw shnong

Khliehriat, ïaiong, 08: Ka Dorbar Shnong Pamra Kmai, East Jaiñtia Hills District, ka la pynpaw ka jingsngew bitar namar ba don ki briew kiba la pynpait pynpra bad pynsniew ïa ki pud ki sam jong ka khlaw shnong bad ong ba ha ka jingshisha hi u pud u sam jong ka khlaw shnong u la bit la biang naduh ki por kiba mynshwa haduh mynta.
Ïa katei ka jingjot, jingpynsniew ïa u pud u sam jong ka khlaw shnong, ba ju tip kum ka Khloo Umpyai, ki paidbah nongshong shnong ki la lap myn ha ka 5 tarik mynta u bnai ïaiong ha ka por ba ki dang pynlong ïa ka jingpynkhuid khlaw kaba ki ju pynkhuid man la u snem.
Halor kane ka jingleh dusmon ki briew kiba na bar kiba la pynsniew ïa u pud u sam jong ka khlaw shnong, na ka liang ka Dorbar Shnong Pamra Kmai ka maham tyngeh ïa kino kino ki briew kiba pynpait pynpra ïa ki maw pud ba la dep shna ha baroh shilynter jong katei ka khlaw kaba don hapoh shnong, ha kajhuh ka por, ki bor shnong kin sa wad jingtip ruh ban lap ïa ki briew kiba la wan ban pynsniew ne pynpra ïa ki pud ki sam bad lada lap ka shnong pynshitom da kaba tyngeh bad kan aiti ruh sha ki bor jong ka aiñ bad pynshitom ïa ki da ki kyndon jong ka aiñ.
Kum shibynta ban pynneh pynsah ïa ka jingjyrngam ka mariang, na ka liang ka Dorbar Shnong Pamrakmai ka ka buh ruh ïa ki kyndon bad jingmana ba ka shnong ka khang pyrshah ban pom pathar ïa ki dieng kiba don hapoh kane ka khlaw, la khang pyrshah ruh ban pyniap dusmon ïa ki doh um kiba don ha ki um, ki wah kiba don ha shilynter ka khlaw shnong, nalor kata ka Dorbar Shnong ka maham ruh ba ym bit ban thang dusmon ïa ki khlaw ki btap kiba don hapoh u pud u sam jong ka shnong.
La ong ba lada lap ïano ïano kiba leh pyrshah ïa ki aiñ shnong, ka dorbar shnong kan pynshitom da kaba tyngeh katkum ka aiñ shnong, pynkut u kyrwoh na u Waheh Chnong, u bah Ïaikiewbha Rymbai bad u Secretary shnong, u bah Wellson.RD. Siangshai.