Shillong, Risaw 11 : Ka kynhun jong ka Meghalaya ka la shah rem noh da 28 ron ha ka Hyderabad ha ka jingïakhun sdang jong ka Senior Women’s T20 Trophy kaba long ha Bangalore hynne ka sngi.
Haba phai sha ka jingïakhun, ka Meghalaya ka la jop ïa ka jingkynting pisa bad jied ban kawang bol nyngkong bad lah ban ai kamai tang 92 ron la 7 wiket. Hynrei na ka daw ka jingthut ka marïang ïa ka jingïakhun la hap ban pynlyngkot noh sha ka 17 over shilliang.
Ha kane ka sngi, ka Debasmita Dutta kaba dei ruh ka kapten jong ka Meghalaya ka la ïoh ban khur ar wiket da ki 22 ron, katba ka Riticia Nongbet, ka Sejal Raut bad ka Ajima Sangma ki la ïoh ban khur mar shi wiket.
Haba beh ïa ka thong, ka Meghalaya ka la shah pynsyier naduh ba sdang da kaba duh shwa ar wiket mar ïa sdang jong ki ar tylli ki over. Hynrei dei lyngba ka jingïalehkai bha ki arngut ki nongïalehkai ba wan ïalehkai na ka Meghalaya, kata ka Vaincy Chaudhury (20 ron) bad ka Anita Lodhi (11 ron) kaba la ïarap ïa ka Meghalaya ban pynneh ïa ka jingkamai lang kaba 27 ron ha ka wiket kaba lai.
Nalor jong ki, ka jingïalehkai bha da ka Dutta (10 ron) bad ka Ajima (10 ron not out) ka la pynlong ïa ka kynhun ban kiew stet ka jingkamai ron tangba ki khlem lah satia pat ban poi sha ka thong ba la buh ban jop.
Ka Meghalaya mynta ka hap pat ban ïakhun pyrshah ïa ka Tripura la shai ka sngi. Ha ka jingïakhun sdang ka Tripura ka la ïoh ban pynliem noh ïa ka Nagaland da ki 48 ron hynne ka sngi.
Ka kynhun ïalehkai jong ka Meghalaya ka kynthup ïa ka Debasmita Dutta, Ajima Sangma, Rubi Chettri, Riticia Nongbet, Rebeldalis Syiemlieh, Daiaka E Warjri, Sildamicresha Marbaniang, Avril K Syiem, Eiffelene K Nongkynrih, Neha Hajong, Solina Jaba, Mansi Anand, Vaincy Chaudhary (guest player), Anita Lodhi (guest player), Sejal Raut (guest player)
Ki prokram ïakhun jong ka Meghalaya ki long 12tarik pyrshah ïa ka Tripura, 13tarik bad ka Andhra Pradesh, 16 bad ka Odisha, 18tarik bad ka Nagaland, 20tarik bad ka Mizoram bad 22tarik pat bad ka Uttar Pradesh.
