Shillong, Risaw 20: Baroh ar ki kynhun lehkai kriket ka Meghalaya ki la mad ïa ka namrem ha kaba ka kynhun jong ki shynrang ka la shah pynliem ha ka Maharashtra ha ka jingïakhun ka lympung Vinoo Mankad Trophy katba ki kynthei ki la liem ha ka Karnataka ha ka lympung Senior Women’s T20 Trophy, kaba la long hynne ka Sngi Thohdieng.
Katba na ka liang jong ka kynhun U-19 shynrang ka jylla ki la mad ïa ka namrem haduh 391 ron ha ka Maharashtra ha ka jingïakhun kaba la long ha Vijayawada, ka kynhun ki thei ka la shahrem da 10 wicket ha ka Karnataka ha Vadodara.
Ha ka jingïalehkai ka kynhun kiba la rangbah ka lympung Vinoo Mankad, ka Meghalaya ka la hap ban bowl nyngkong bad shah khyrwit haduh 466/6 haduh kaba kut jong ka 50 over pyrshah ïa ka Maharashtra, ha kaba u Digvijay Patil u la khyrwit haduh 239 na ki 139 bol shuwa ban shah pynhap ha u Angkit Tamang u ba la khur 3/85. U Da-u-la-biang Shangpliang u la khur 2/88 katba kiwei pat ki wicket ki la shah pynhap lyngba ka run out na u Shavian Blah.
Ha ka batting, ka Meghalaya ka la ïohlad ban kynjoh tang sha ka 75/10 naki 26.4 over. U Lensbirth Marak u la kamai 12 ron, u Shubham Rasaily 17 ron bad u Angkit 16 ron ki dei kiba la ïoh ban kamai khambun ron ïa ka jylla.
Haba phai sha ki thei pat, ka kynhun Meghalaya ka la shah pyntied nyngkong pyrshah ïa ka Karnataka bad ka la shah pynhap baroh tang hadien ba kynjoh sha ka 41 ha ka 12.2 over na ki 20 over ba la buh, ha kaba ym shym la don kawei ruh kaba tam palat ïa ka 7 ron na ka kynhun. Hadien kane, ka Karnataka ka donkam tang 7.3 over ban kynjoh sha ka thong ba la buh khlem da shah pynhap shi wicket ruh.
Ka Meghalaya kan sa hap ban aireng sa ïa ka Tamil Nadu la Sngi U Blei. Bad, ha ka Syed Mushtaq Ali Trophy, ka Meghalaya kan aireng pyrshah ïa ka Chhattisgarh mynta ka sngi ha Jaipur.
