Jowai, Naitung 30: Ka jingsniew palat u surok na Shilliang Myntang, Samatan, Thadialong haduh Takhniang, Nongjngi kiba hap hapoh ka 4-Mowkaïaw Constituency Assembly ka la pynsuhsat haduh katta katta namar ba ka Sorkar jylla ka la ieh beiñ ïa kane ka surok da ki phew snem wat haduh mynta khlem don shuh ka jingmaramot ne shna thymmai.
Kane ka surok ba pynïasoh ïa kiba bun ki Shnong naduh Mukroh, Barato, Thngraiñ, Shilliang Myntang haduh ban da poi sha ka Shnong Nartiang, Wahïajer, Ummulong.
Kumba long mynta ïa kane ka surok la shna naduh Nartiang haduh Tahkhniang ba long tang shiteng na ka surok bad kaba sah ka long ba kane ka surok mynta ka la jot rathai.
Kum ki nongshong shnong kiba shong basah ha kane ka dong ka thaiñ ki la mad shibun ki jingeh jingshitom khamtam ha ka leit ka wan ka kit ka bah namar ka jingsniew palat kane ka surok kaba dap tang ki thliew ki syar. Shuh shuh halor kane kum ki nongshong shnong ki dap da ka jingdiaw mynsiem ba ka sorkar ka khlem phaikhmat shuh ban pynbha ïa kane ka surok. Namar kane ka surok ka pynïasoh bun tylli ki shnong ban poi sha ka Hospital PHC Nartiang khamtam ha ka pang ka shitom bad kumjuh ïa kiba leit shim dawai na ki jaka sumar.
Namar kata ka jingsniew ka surok kala buh jingeh ïa ki paitbah kiba leit donkam sha ka Police Station kaba don ha Nartiang namar kine ki Shnong ki hab hapoh ka Police Station Nartiang, bad nalor kata ki khynnah skul kiba leit pule ha ki skul kiba don ha ka Shnong Nartiang, Ummulong Jowai bad wat shaduh sha Nongbah Shillong bad kiwei ki jaka ki hap ïaid lyngba kane ka surok.
Ym tang katta, wat nongrep kiba leit sha ki ïew kiba don ha Nartiang Ïew Pynsing kaba don ha ka Shnong Wahïajer kum ka ïew baheh hapoh ka ri Jaiñtia ki la mad shibun ki jingeh namar ki jingsniew ka surok bad ki shem shitom ban pynpoi ïa ki mar rep jong ki ha kine ki ïew.
Kane ka la ktah ïa ki paitbah ha baroh ki liang namar ka surok na Mukoi lum haduh Barato la dep shna pynbha bad na Tahkhniang Nongjngi haduh Nartiang la dep shna bad kaba sah ka long hapdeng ka surok naduh Barato haduh Shilliang Myntang la dep shna da ka Scheme NEC bad ka long ka surok kaba rit bad ka surok naduh Shilliang Myntang haduh Tahkhniang haduh Nongjngi ka surok ka bym long shuh ban ïaid da ki kali rit lait noh tang da ki Truck bad ki Dumper.
Halor kane ka jingeh ki paitbah ki dawa jur bad kyrpad ïa ka sorkar lyngba ka tnad PWD kan shimkhia ban pynbha ïa kane ka surok namar ka long kaba donkam ha ka leit ka wan ka pang ka shitom bad ha baroh ki liang.
