Lyngngoh ka DS Kenches Trace ba ïoh EPIC, um bad bording kiba sah ha Maxwelton Estate

Shillong, Rymphang, 17: U Rangbah Shnong ka Dorbar Shnong Kench’s Trace Oxford Rilbong u Bah Glanding Lyngdoh u la ong ba ka Shnong kam tip ïa ka jingïoh Epic, umbam umdih bad bording kiba sah ha Maxwelton Estate bad kam tip ruh mano ba wanrah ïa ki ban sah ha katei ka jaka.
“Katkum ka jingtip ki nongthep vote ki don 90%, ki ïoh tan bording, ka umbam umdih hynrei ngim tip naei ki ïoh, na ka liang ka Shnong te ngim ju ai eiei ïa ki. Haba ki lah ïoh Epic te ka Shnong kan ong kumno kim lah dei ki nongthep vote jong ka 19 South Shillong. Ki don ki syrnot sngikha,” ong u Bah Glanding Lyngdoh.
U Bah Glanding u la ïathuh ruh na ka por sha ka por ka Shnong ka la ju leit ban ujor sha ka ophis DC bad sha ka Municipal Board ban weng noh ïa ki sem masi kiba don ha katei ka jaka namar ba ka la pynjaboh ïa ka mariang.
“Kadei kaba shisha kane ka hap hapoh ka jingpeit jingkmih jong ka DS bad kadei ka kam kaba lah riem bha hynrei ngim pynpaw pyrthei ngi trei jar jar. La bunsien ngi la leit ban ïakynduh ïa ka ophis DC bad Municipal Board ban dawa weng noh ïa ki briew kiba sah ha katei ka jaka kidei kiba sah be-aiñ. Ki briew kiba sah hangtei mynshuwa kim don ki paiñkhana bad ka pynjaboh ïa ka mariang, hynrei ym don ba sngap,” la ong u Bah Glanding.
U Rangbah Shnong ha ka jingïadonlang u secretary Shnong u Bah M. Lyngdoh, ki Rangbah dong ba kynthup u Bah B. Malngiang, Bah DL Nonglait bad u Bah Victor Kurbah, u la ïamynjur lang bad ka KSU kaba la kynnoh ba kidei kiba sah be-aiñ kadei hadien ba ka Shnong ka la pan jingbit ban shna ïa ka ophis treikam jong ka shnong ha katei ka jaka pynban ka ophis DC ka khlem ai.
“Ka Shnong jong ngi ka lah dap 40 snem bad haba ngi leit pan jingbit ryngkat ki jingthoh na ka ophis DC ban shna ophis treikam ha katei ka jaka pynban ki khlem ai namar ba ka dang don hapoh ka ïingbishar. Kumta ngi sngewthuh ba kitei ki briew ki shu shong be-aiñ.”
Shuh shuh u Bah Glanding u la ïathuh ruh ba mynshuwa la buh mawnongrim ban tei ïa ka Raid Laban College bad kumjuh shna Park ha Maxwelton Estate hynrei ka la pulom noh.
U la ïathuh ba ka dorbar Shnong kam shym la shong kli kti halor kane ka mat ba ka KSU ka la mih mynta shakhmat hynrei ha kine ki 15 snem eiei ka dorbar Shnong ka la ju pynsngew sha ki bor ba halor khamtam ha ka ophis DC ban leh eiei, ba ka Shnong ka kwah ïa ka shongsuk shongsaiñ bad ïa ka khuid ka suba.
“Man ka por ki heh ki haiñ ki ju ïaid lynti na katei ka jaka hynrei kim don khmat, man ka por ngi ju leit jurip lang bad ki ophisar ha katei ka jaka ban pynbeit thymmai noh, hynrei haba la ai kaiphod ka shu sahkut noh tang ha kiba halor. Kane baroh kadei ka jingbym lah jong ka Sorkar ban pynbeit,” la ong u Bah Glanding.
Kum ban kdew hangne ba ka KSU dang shen ka la leit ban ïakynduh bad aiti ïa ka dorkhas ha ka Deputy Commissioner jong ka East Khasi Hills District ka Kong RM Kurbah bad ai por gapoh 15 sngi ban weng noh ïa kiba sah ha Maxwelton Estate.