Lyngba ka Viksit Bharat Sankalp Yatra ïoh jingtip ki paidbah shaphang ki skhim Sorkar
Shillong, Naiwieng, 19: Ka Viksit Bharat Sankalp Yatra (VBSY) ka dang ïaid shakhmat ha Meghalaya ha kaba ki nongshong shnong na ki block bapher bapher ki ïashim bynta bad ki kali Information, Education, and Communication (IEC) van. Kine ki kali ki dei kiba leit sha ki shnong ban ai jingtip shaphang ki skhim ba ai jingmyntoi jong ka Sorkar Pdeng. Ha kane, ki briew ki la ïalum hajan ki kali IEC Van bad ki la ïakren bad ki nongmihkhmat na ki tnat Sorkar Pdeng bapher bapher, ki bank bad ki kompani umphniang bad ki la twad jingmut shaphang ki jingshim ram na ki bank bad ruh ka Pradhan Mantri Ujjwala Yojana.
Ha East Khasi Hills District, ki kali IEC van ki la poi sha ar tylli ki shnong ha ki block Pynursla, Mawpat bad Sohiong. La pyrshang ban ai ki jingshakri jong ki skhim ba pyntreikam da ki tnat Sorkar bad ruh ban ai jingtip shaphang ki jingmyntoi kiba wan na kine ki skhim lyngba ka jingïarap jong ka NABARD, Krishi Vikash Kendra, ka kompani Gas, National Fertiliser Company Limited bad kiwei kiwei ki kynhun Sorkar.
La pynlong kum kine ki prokram ha ki Gram Panchayat jong ka Umlangshor & Mukhla Nongrim hapoh ka Thadlaskein Block ha West Jaintia Hills district. Ki briew ki la ïalum ha ki jaka VBSY ha kaba ki nongmihkhmat na ki tnat Sorkar bapher bapher ki la ai jingbatai shaphang ki jingmyntoi jong ki skhim jong ka Sorkar Pdeng.
Kine ki kali IEC ki la pyni ïa ki bynta jong ki skhim ba kongsan bad ki prokram bapher bapher jong ka Sorkar ha kine ki khyndai snem ba la dep bad kane ka la khring bha ïa ki briew kiba la ïathuh ïa ki jingshem jong ki shaphang ki sienjam jong ka Sorkar. La sam ruh ïa ki calendar 2024, kot lyngkdop bad kiwei kiwei ki kot kiba ai jingtip shaphang ki skhim na ka bynta ka bha ka miat bad ka roi ka par jong ki briew ha kane ka jaka.
Kane ka Yatra, kaba la sdang ha ka Janjatiya Gaurav Diwas (Naiwieng 15, 2023), ka thmu ban pynpoi ïa ki jingshakri ba kongsan sha baroh ki briew kiba dei ban ïoh ïa kine ki jingshakri kiba ïadei bad ka jingkhuid jingsuba, ki kam pisa, ka jingpynpoi bording elektrik, ki iing sah briew ïa kito kiba duna jingïoh, ka jingshngain ha ka jingïoh mar bam, ka bam kaba tei met, ka um dih kaba khuid bad ka pule puthi kaba bha. Ka jingpeit bniah ka long halor ka jingai jingtip bad ka jingpynthikna ba baroh ki ïoh ïa ki jingmyntoi.