Lyngba ka Education Commission bishar ka Sorkar ban pynïaid ryntih ïa baroh ki skul

Shillong, Rymphang 28 : U Myntri ka tnad pule puthi jongka jylla u Rakkam A Sangma u la pyntip ba ka sorkar ka dang pynkhreh ki lad ki lynti bad ka dang bishar bniah ruh ba lyngba ka Meghalaya State Education Commission (MSEC) yn pynïaid ryntih ïa baroh ki skul hapoh ka jylla.
Ym tang ka jingpynïaid ryntih ïa ki skul bapher bapher hynrei yn bishar bniah ruh ïa ka rukom thung ïa ki nonghikai kat kum ka jingdon ki khynnah skul, ong u Rakkam haba jubab ha ka unstarred question ba la wanrah hapoh ka ïing dorbar.
U la ïathuh kumba long mynta ka sorkar ka don hynriew tylli ki College, 40 tylli ki Grand-in aid College bad 31 tylli ki private college bad ïa mynta kine ki college ki la biang ban ai jinghikai ïa ki samla pule sha ki kyrdan ba kham shalor hapoh ka jylla.
U la ïathuh ruh ba ka sorkar haduh mynta kam pat ïarap pisa ïa ki community bad private college bad na kata ka daw ka jingsiew ïa ki nonghikai ka duna bha lada ïa nujor ba ki deficit government college. Ka daw ka dei namar ba ka sorkar ka duna fund bha mynta.Hynrei wa tla katta ruh ka sorkar ka dang pyrshang hi ban thaw ki lad ki lynti ban ïoh ïarap pisa ïa ki private college bad na kata ka daw ruh ha kine ki lai snem ba la dep la pynkylla haduh 21 tylli ki private college kum ki people’s college.