Shillong, Naitung, 24: Ki runar bym lah ban ithuh durkhmat ha ka Lah Sngi U Blei ha ka por kumba 12 baje mynsngi ki la thombor naphang ïa ki kynthei kiba ju die jingdie hajan ka Shiv Temple kaba don ha Mahadev Khola.
Katkum ka jingïathuh jong ki kynthei kiba la shah thombor ha ki runar kiba don hapoh 10 ngut eiei, la ong ba kine ki runar ki dei kiba ju wan jingthied manla ka por na kane ka jaka hynrei mynta ka sngi kine ki runar ki la pyrshang ban shu knieh jubor ïa ki jingdie khlem da siew pisa.
La kynnoh ruh ba kine ki runar ki la lute bad shoh ïa ki kynthei kiba don ha kane ka jaka ha kaba katto katne ngut ki la mynsaw ha kane ka jingshah thombor. Hadien kane, ki runar ki la phet krad lailum laiwah sha ka khlaw kaba don markhap bad ka Mahadev Khola.
Ha ka jingkren bad ki bor pynïaid jong ka Shiv Temple, ki la pyntip ruh ba kum kine ki kam thombor ha kane ka jaka ki ju jia na ka por sha ka por.
Ki Pulit jong ka East Khasi Hills District hapoh ka jingïalam jong u Superintendent of Police (City) u Bah Vivek Syiem, ki la leit marmar sha kane ka jaka tang shu ïoh jingtip halor kane ka jingjia ban pynlong ïa ka jingtohkit kaba bniah. Ïa mynta ki Pulit ki la pynlong ka jingtohkit kaba bniah da kaba peit lyngba ka CCTV ba la pyndait ha kane ka jaka khnang ban ïohkem ïa ki runar kiba donkti.
Ki Pulit ki la pynjur ïa ka jingpahara hadien kane ka jingjïa khnang ban ai jingïada ïa ki briew kiba sah hajan jong ka Shiv Temple kaba dang hap hapoh ka jingpeit jong ka tnat Forest ka Sorkar Jylla.
