SHILLONG, Jylliew 08: Ka All Meghalaya Karate-Do Association ka la pynlong ïa ka jingïalang jong ki kmie ki kpa ryngkat ki khynnah ha ka 07 tarik Jylliew 2025 ban pynsngewthuh ïa ki halor ka jingpynkhreh ïa ki kynhun ïalehkai na ka bynta ka 39th National Games 2027, ka ban sa long ha Shillong.
Baroh ki khynnah ïalehkai kiba lah ban shah jied na ka bynta ka prokram pynkhreh ki la wan ïashim bynta ha kane ka jingïalang ryngkat bad ki kmie ki kpa jong ki.
Ki dkhot nongkitkam jong ka Association ki la batai ïa ki halor ka jingthmu ban ai jinghikai kaba 20 bnai bad ka jingkyrshan bad ki jingdonkam kiba yn ai da ka sorkar.
Ka Association ka la kyrpad ruh ïa ki nongïalehkai ba kin shimkhia bad ka jingkyrshan kaba pura jong ki kmie ki kpa ban pyntikna ïa ka jingjop jong ka kynhun Meghalaya.
Kiba don ha kane ka jingïalang ki long: u President ka AMKA u Bah Hunlang Lytan, u Bah Banshanlang Kharumnuid-Vice Presidents, u Bah Ksan Kupar Warjri – General Secretary, ryngkat bad ki dkhot nongkitkam ba kynthup ïa u Bah Donboklang Lyngdoh, Arjun Sewa bad u Bah Mingson Rymbai.
