Lum u DC ïa ki nongïalam Sengbhalang ba thmu pynkynriah ïa ka Civil Hospital
![](https://mawphor.com/wp-content/uploads/2022/11/dcswkh.jpg)
Nongstoiñ, Naitung 19: Namar ka jingthmu ban pynkynriah ïa ka jingtreikam jong ka Nongstoiñ Civil Hospital kaba don ha Mawkadiang sha ka Mother and Child Hospital kaba don ha Upper New Nongstoiñ, kaba la ai jingmut da ka Myntri ka koit ka Khiah ka Sorkar Jylla ka Dr.Ampareen Lyngdoh ha ka jingwan jngoh jong ka dang shen, u Deputy Commssioner jong ka West Khasi Hills u Bah Garod L.S.N Dykes ha ka sngi Balang, u la khot ïa ki nongïalam jong ki Sengbhalang ka District ban ïakren bad ïatai sani halor kane ka jingthmu.
Ha ka jingïalang, ki nongïalam sengbhalang kiba la ïashim bynta ki long na ka KSU, HANM, HYC,WKSU,WYF bad kiwei kiwei ryngkat ka jingdonlang jong u MLA ka Nongstoiñ Constituency u Bah Gabriel Wahlang.
Ha ka jingialang, la ïakren ruh ha kaba ïadei bad ka jingthmu ban rah noh ïa ki tiar na MCH Nongstoiñ sha Mawkyrwat, ha kaba baroh ki sengbhalang kiba la ïadon lang ha katei ka jingïalang, ki la pyrshah jur bad ki la ong ruh ba kin ym shah da lei lei ban rah ïa ki tiar ki tar na katei ka jaka sumar na Nongstoiñ sha Mawkyrwat.
Ha kaba ïadei bad ka jingthmu ban pynkynriah ïa ka Civil Hospital na Mawkadiang sha ka MCH ha Upper New Nongstoiñ, u bah Willstone Sohshang president ka HANM bad u Bah Wanteibok Lyngdoh Secretary ka HYC West Khasi Hills, ki la ong ba na ka liang jong ki kin ym shah da lei lei, namar ba lada rah ïa ka Civil Hospital sha MCH kan wanrah ïa ka jingkhapngiah kaba jur ha ka leit ka wan bad ka jingtei jong ka MCH kam ïahap satia ban pynlong Civil Hospital namar ka rit palat ka jaka.
Ha kaba ïadei bad ka jingthmu ban rah ïa ki tiar sha Mawkyrwat, ki nongïalam jong ki seng bapher bapher ki la ong ba kin ym shah da lei lei, hynrei ki dei ban buh beit ha ka jaka ba ki la don. Na ka liang ki nongïalam jong kiwei kiwei ki seng ruh kim pat kwah ban ong ei ei hynrei ki la ong ba kin da shong pyrkhat shuwa, hadien kata kin sa shim ïa ka rai.
U Deputy Commissioner haba ïakren bad ki nongthoh khubor hadien ba la wai ka jingïalang, u la ong ha kaba ïadei bad ka jingthmu ba ïa ka Civil Hospita yn pynkynriah sha MCH kam sngew ïahap satia. Ha kaba ïadei bad ka jingpynkynriah ïa ki tiar na MCH Nongstoiñ sha Mawkyrwat, na ka liang ki sengbhalang kim pat lah ban ong ei ei hynrei ki la kyrpad bad buh por ar sngi ba kin ïapyrkhat shuwa.