Nongpoh, Ïaiong 10: Namar ka jingïoh nam ka thaiñ Byrnihat kum kawei ka jaka ba jur tam ka lyer jaboh ha ka pyrthei katkum ka IQAir’s 2024 World Air Quality Report bala pynlait da ka Kompani Swiss Air Quality Technology dang shen, ka Meghalaya State Pollution Control Board, mynta ka sngi ka la lum ïa ki trai karkhana ha ka jylla Meghalaya ban pynlong da ka jingïathir ïatai halor kumno ban tehlakam bad ban pynduna ïa ka jingpynmih ïa ka lyer jaboh ha ka thaiñ Byrnihat bad kumjuh ruh kiwei kiwei ki karkhana kiba don ha ka jylla, kumba ka sorkar jylla mynta ka don ha ka thong ban ïakhun ïa ka lyer jaboh khamtam ha ka thaiñ Byrnihat.
Ha katei ka jingïalang bala pynlong ha La Nicholas Dei Da Kine Resort, ha ka shnong Umbir la sakhi ruh da ka jingdon jong u Dr GH Chyrmang Member Secretary ka MSPCB, Bah S Swer Senior Scientist, ka kong D Syiemlieh Senior Environmental Engineer, Bah S Syiem, Bah JF Lamurong bad u Bah MS Tiewsoh kiba dei ki Environmental Engineer ryngkat ki nongmihkhmat na ki karkhana bapher bapher na ka jylla Meghalaya khamtam na ka thaiñ Byrnihat, lem bad ki kompani kiba shna ïa ki tiar ban pynduna ïa ka jingpynmih lyer jaboh.
Haba kren sha ki lad pathai khubor na ka liang u Dr GH Chyrmang u la ong ba na ka liang ka MSPCB ka la pynlong khnang da ka katei ka jingïalang ïa ki trai karkhana bad kumjuh ruh ki riewstad bad ki kompani kiba lah ban ïarap ban pynduna ïa ka lyer jaboh na ka bynta ban ïakhun ïa ka lyer jaboh ha ka thaiñ Byrnihat bad kumjuh ruh ha ka thaiñ Umiam na ka jingdon ki karkhana ha kitei ki jaka.
U la ong ruh ba ka jingthmu jong katei ka jingïalang ka long kum ka jingkynduh lang naduh ki trai karkhana, ki kompani ba ju pynmih ïa ki tiar ban pynduna lyer jaboh namar bunsien ki karkhana ki ju ud bad shem jingeh ban ïakynduh bad ki kompani kiba ju shna ïa ki tiar ban pynduna ïa ka jingpynmih lyer jaboh, namar ka kam jong ka MSPCB kam dei tang ban pynshitom bad daiñ kuna ïa ki karkhana pynkheiñ aiñ, hynrei ban ïarap ruh ïa ki ban pynjan bad ki kompani kiba ju shna ïa kitei ki tiar pynduna ïa ka lyer jaboh katkum ka juk ba mynta namar ngi donkam ïa ka roi ka par bad kumjuh ruh ka lyer kaba khuid.
