Lum ka KHADC ïa ki khlieh nongsynshar ban pynkhlaiñ ïa ka jingkam trai ïa ki jaka kajia pud

Shillong, Naiwieng, 23: Ka Boundary Committee ka Khasi Hills Autonomous District Council (KHADC) ha ka sngi Ba-ar ka la shong ïa ka jingïalang bad ki khlieh nongsynshar jong ka Hima Mylliem, ka Raid Nongtung, Hima Nongspung, Hima Nongkhlaw bad Hima Jirang ban pynskhem halor ka jingkam trai jong ki ïa ki jaka ban ïa pynbeit pud hapdeng ka jylla Meghalaya bad Assam.
Haba kren sha ki lad pathai khubor u Chief Executive Member (CEM) ka Khasi Hills Autonomous District Council (KHADC) uba dei ruh u Chairman ka Boundary jong ka KHADC u Bah Titostarwell Chyne u la ïathuh ba ka rai kaba mih na kane ka jingïalang ka long ba ka Committee ka la aiti ha ki hima bad ki raid ba kin pynbiang ïa ki kot ki sla ki dulir jaka puta ban pynskhem ïa ka jinglong trai jong ki ïa ki jaka ba ki kam trai.
U la ong ba na ka liang ka Boundary Committee ka la ai por sha ki khlieh nongsynshar ba kin pynbiang ïa ki kot ki sla shuwa ka 30 tarik ha kaba ka Regional Committee ba peit ïa ka Ribhoi kan sa shong jingïalang.
U la ïathuh ba ki shnong kiba hap ha Block II kiba ka Hima Khyrim bad Raid Nongtung ki kam trai don kumba 22 tylli bad ong ba kine baroh ki shnong ki dei kiba dang hap hapoh ka jylli synshar ka KHADC.
U la ïathuh ba ka Hima Nongspung ka kam ba ka Bardua kaba heh kumba 147 SQ KM ki dang dei ki bynta ka hima.
U la ong ruh ba ka Hima Nongspung ka kam ïa ki 8 tylli ki shnong kiba la shah klun ha ka Assam bad ïathuh ba ka Raid Wah Mawtamur la wan mihkhmat da u Syiem ka Hima Jirang.
Shuh shuh u la ong ba ha kane ka sngi ki nongmih khmat jong ka Hima Nongkhlaw kam shym la poi satia sha kane ka jingïalang.
“Ka jingïalang da kawei ka sur ka la rai ban aiti sha ki hima bad ki raid ba kin pynbiang ïa ki kot ki ki sla sha ka Boundary Committee khnang ba u nongmih khmat na ka liang ka KHADC un ïoh rah ïa kine ki kot ki sla sha ka jingïalan ba ka Regional Committee jong ka Ribhoi kaban shong ha ka 30 tarik,” u la ong.