Loreto Convent Annual School Sports Day: Ai kopi u Working President ka MSOA ïa ka Meghalaya Sports Policy 2019 sha i Principal jong ka skul

SHILLONG, ïaïong 05: U Working President jong ka Meghalaya State Olympic Association [MSOA], u Bah John F Kharshiïing u la ai ïa ka Meghalaya Sports Policy 2019 sha i Sister Mable P Rudun, Principal jong ka Loreto Convent ha ka sngi ïalehkai Sports ba shisien shi snem lane ka ha ka Annual Sports Day jong ka skul kum ka dak ban kyntiew ïa ka jingsngewthuh bad ka jingpynïasoh ïa ka polisi ïalehkai hapdeng ki jaka pule ha ka jylla.
Haba ai jingkrenha kane ka sngi, na ka liang jong u Bah Kharshiing u la pyntip shaphang ki bynta jong ka Meghalaya Sports Policy 2019, kaba la pynbna da ka Sorkar Meghalaya ban thaw ïa ka rukom treikam kiba ryntih bad kaba kynthup ïa baroh ban kyntiew ïa ka kam ïalehkai, kynthup ïa ka jingthung ïa ki nonghikai ïalehkai kiba tbit kiba don ki kyrdan pule (qualified Physical education Teachers-PET).
U la kdew ba wat hapdeng ki jingeh kiba bun ka polisi ka la wanrah ïa ki katto katne ki jingjop bad ki jingthmu kiba kongsan kiba kynthup ïa:
– Ka jingpynkylla ïa ka Meghalaya Service Rules, kaba pynlah ïa ki jingai jingkyrshan kiba kham kyrpang ha ka jingïalehkai ïa ki nongïalehkai kiba tbit kiba dei ki nongtrei sorkar.
– Ka jingmih biang ka Meghalaya Games hadien 16 snem da ka jingjop ban pynlong ïa ka Meghalaya Games kaba lai ha u snem 2020, kaba saw ha u snem 2022 ha Shillong, kaba san ha u snem 2024 ha Tura, West Garo Hills District bad kaba hynriew ha u Kyllalyngkot 2025 ha Jowai, West Jaiñtia District.
– Ka jingpynlong ïa ka jingïalehkai Olympic jong ka thaiñ shatei lammihngi kaba ar ha u bnai Nohprah 2022 ha Shillong, kaba la wanrah bad pynmih ia ka jingtbit ha ka jingïalehkai na ka jylla.
-Ka jingpynrung ïa ki khusnam pisa bad ki jingai jingai bai bnai shisnem na ka bynta ki nongjop takma ha ka kyrdan jong ka jylla bad ka ri.
Ka jingpynlong ïa ka Talent Identification Program (TID-3) kaba 3 na ka bynta baroh ki jait jingïalehkai ha ryngkat ka jingïatreilang bad ka tnad Sports, jong ka Sorkar Meghalaya kaba dang don hapdeng ka jingpyntreikam bad kaba lah jan kut ha kaba la pynlong ka jing test ïa ki shiphew hajar ngut ki khynnah ha kylleng ki 12 tylli ki District bad dang bud sa ka bynta ïa ki ar spah ngut ki khynnah kiba la ïoh ïa ka kyrdan ba hakhmat eh bad kaba kine ki ar spah ngut ki don hapoh ka jingkhmih ka jing hikai bad jingïalehkai kaba shisnem, bad ha ka jinghikai pynkhlaiñ met hapoh ka jingpeit bñiah hapoh ka jingïalam jong ki Olympian ba la paw. Ki ba la shah jied ki nongïalehkai ba pawnam ha ka prokram Super Elite ki la sdang pyni ïa ka jingkiew kaba bha ha baroh ki liang.
U Bah Kharshiing u la pynpaw ïa ka jingsngewnguh kaba khraw ïa u Myntri Rangbah ka Jylla Meghalaya u Conrad K. Sangma bad u Myntri ka tnad ïalehkai ka Jylla u Bah Shakliar Warjri halor ka jingshimkhia jong ki ban kyntiew ïa ki kam ïalehkai. U la ai khublei kyrpang ïa ka jingpyrshang jong ki ban pynthikna ban pynurlong ïa ka 39th National Games 2027 hapoh jylla Meghalaya, kaban long ka jylla kaba lai ha ka thaiñ Shatei Lammihngi—hadien ka Manipur (1999) bad ka Assam (2007)—ban pynlong ïa kane ka lympung ba donburom.
U la ban jur ba kane ka long ka kabu kaba khraw kan pynkylla ïa ka jinglong ïalehkai jong ka Meghalaya bad kan sa ai mynsiem ïa ki pateng ban wan.
Ha ka khubor ba kyrpang sha ki nongpynïaid skul, u Bah Kharshiing u la kyntu ïa ki bor pynïaid skul ban pynneh pynsah bad ban ïasam ïa ki jingthoh ka jinglah jong ki nongïalehkai ha ki jingjngai ha ka kynthih bad ka por mareh ha ki por ïalehkai bad ban pyntip lang sha ka MSOA, namar ki jingtip bad ki jingthew ki long kiba kongsan bha ban buddien ïa ka sap bad ka jingkiew jong ki samla.
U la ban jur ba man la ka jinglehkai ka don jingmut bad ka lah ban long ka jingsdang jong ka jingïaid lynti jong ki nongïalehkai sha ka jingkhraw.
U la pynkut da ka khubor kaba khlain bad kaba ai mynsiem ia ki samla pule, da kaba shim mynsiem na ki katto katne ki riew pawnam ha ka pyrthei ha ka jingialehkai:
“Nga lah ban pdiang ïa ka jingbymlah, hynrei ngam lah ban pdiang ïa ka jingbym pyrshang.” – U Mikhael Jordan
“Ka jingjop kam dei ka jingpyrshang kaba shisngi; ka dei ka jingmih na ki snem jong ka jingtrei shitom bad jingaiti lut.”P.V. Sindu
“Ka sap khlem ka jingtrei shitom kam long ei ei. – Cristiano Ronaldo
“Wat ong ba phi tlot, namar ba phi dei ka khynnah kynthei. – Mary Kom
U la pynshlur ïa ki samla pule ban pynkhih ïa ki pud jong ki, ban ngeit ha lade, bad ban ym shah rem satia. “Ka jingïalehkai ka kham palat ban ïa ki takma jop,” u la ong, “ka dei shaphang ka jinglong ryntih, ka jingminot, bad ka jingïatreilang.”
“Man la u nongjop u la long shisien u nongsdang. La phi jop ne rem mynta ka sngi, kaba kongsan shisha ka long ba phin ïashim bynta da ka jingsngewtynnat, ka jinglong ba janai, bad ka jingkut jingmut. Sdang mynta ka sngi, ai ïa kaba bha tam jong phi, bad ai ba ka jingïaid lynti jong phi kan ai mynsiem ïa ka lawei.”
U la pynkut da kaba kitbok kitrwiang ia baroh ki khynnah skul ïa ka sngi ïalehkai kaba kyrpang bad kaba kmen bad u la ai khublei ïa ki bor pynïaid skul bad ïa i Principal Sr. Mable na ka bynta ka jingkhot bad jingaiti jong ki ban pynroi ia ki samla kiba don sap.
Kane ka long katkum ka kyrwoh na ka Meghalaya State Olympic Association (MSOA).