Ka long kaei kaei kaba i pangmet bad kaba i synei ban ïohi ba wat la ka nongbah Shillong ka dang dei hi tang iwei na i shnongrit, haba ïa nujor bad ki sor bah jong ka ri India, hynrei wat hangne ruh ka jingdon jong ki briew kiba shu shang makia bad kiba khlem ïing khlem sem ka la sdang bun bad kharoi na ka por sha ka por. Kiba bun na kine ki briew hi ki dei kiba la im ha ka kutlad haduh ban da kylla lyngkar ka jingim kat haduh ba kim lah shuh ban don ha ka imlang sahlang bad la ki jong ki longïing longsem kumta ki jied ban im ïa ka jingim kum ki riew khlem ïing khlem sem bad ban sah ha ki surok bad ki kyndon kynshrot katba lap hapdeng jong ki ïew bad rud dukan jong kane ka sor Shillong.
Hato ka sorkar kam lah mo ban kem noh ïa kine ki briew bad set ïa ki na ka bynta ban ai jingsumar ïa ka bor pyrkhat jong ki khnang ba kin lah ban ïoh pat ia ka jinglong kaba dei biang ne kaba long normal kumba long ki paidbah. Hangne hapdeng jong ka sorkar khamtam ki bynta jong ka G.S Road naduh ka thaiñ Matphran sharum haduh Khyndailad la iohi ba ki ju don ki briew kiba siangthiah ha ki baranda dukan bad don ruh kiba thiah ha ki synduk kot ha ki por miet bad kaba kham isynei shuh shuh ka long ba kine ki briew ki ap jingbam beit na ka jaka theh ñuit kaba ha Motphran bad ki don ruh ki kynthei ba rah wat i khun rit ban khure bam na kaei kaba la wan bret da ki briew.
Ki la don ruh ki kynhun YouTuber kiba la ring video ïa ka jingim jong kitei ki briew bad ruh kiba la ïakren bad kitei ki briew bad kaei ka jingeh kaba ki ïakynduh. Kat kum ka jingphla jong kitei ki riew makia la ïohi ba ka dei na ka daw ba kila im ïa ka jingim kaba kyrni ban dih ia ki kynja, ki drok bad ruh ka kyiad kaba la pynlong ïa ki ban duh noh ïa ka bor jingieit bad ka bor pyrkhat ban lah ban sahlang imlang bad la ki bahaïing ha sem. Kitei ki briew ki ïathuh ruh ba kim kwah shuh ban sah lang bad ki briew kiba biang ka rukom im namar ba ha ki hi ka kham suk shibun ban shu im kumtei bad leh kat ia kaba ki sngewmon tang ba kin ïoh ïa kaba ki kwah kata hi ka la biang na ka bynta jong ki.
Haba peit bad bishar ia ka jingim jong kitei ki briew ka jingduk bad jingkyrduh kam dei eh ka daw ban pynlong ïa ki haduh utei u pud, hynrei kaei kaba lah ban ong ba kitei ki briew ki la ngat ha ka jingpang kaba shyrkhei ha kaba ka bor pyrkhat jong ki kam long shuh kaba beit. Kumba haba ngi peit ha ka imlang sahlang ngi ïohi don shibun bah ki briew kiba duk bad kiba kyrduh hynrei kim hap ban im ha katei ka rukom, ki trei ki ktah, ki kamai kajih wat la ka dei ba kin kit daju, trei bylla ha ki kam ki bama bama ruh. Ngi ïohi katno ki briew ki trei shitom wat ban im shapoh ki krem dewiong ruh ban kamai ia kata ka hok ban im lang kumba im kiwei pat ki para briew ha kane ka pyrthei.
Hynrei ka jingbymlah shuh ban synshar ïa la ka jong ka jingim ka kylla long ka jingpang ba shyrkhei tam. Kitei ki briew ki kham koit kham khiah shibun ha kiwei pat ki bor met ban ianujor bad kiwei pat briew kiba biang. Hynrei ka bor pyrkhat jong ki kam ailad iaki ban im ïa ka rukom im kaba ïa long paidbah. Kumta kitei ki briew ki donkam ia ka jingshim khia lem jong mano re mano, lehse ki la don ei ki seng trei mon sngewbha kiba kloi ban ai jingïarap ia kitei ki briew hynrei ka long pat kaba eh namar ba wat ki baha iing ha sem jong ki ruh kim lah ban pdiang ïa ki na kaei kaba ki long.
Kumta lada ngi don ïa ka mon kaba khlain na ka liang jong ka sorkar ban pyrkhat lem shaphang jong ki, da kaba kem ne ïalam noh ïa ki sha ki jaka sumar na ka bynta ba kitei ki briew kin ïoh pat ia ka bor pyrkhat kaba biang kan long ka jingiarap kaba khraw. Ngi don ïa kata ka tnad Social welfare bad ki briew kiba la pyntbit ialade ban trei ha kaba shakri ia ka bha ka miat ka imlang sahlang. Hynrei haduh katno na ka liang jong ka sorkar ka la shim khia ha kaba ïadei bad kane ka kam. Kyrmen ba kan don kata ka jingpeit kyrpang ne ka Special drive ban peit ïa ki briew kiba don ha kitei ki jingeh jong ka jingim khnang ba kin ïoh pat ia ka kabu ban im kumba ïalong lang baroh.
