Nongstoiñ, Jymmang 30: U Deputy Commissioner-cum-Chairman West Khasi Hills District, u la pynmih ïa ka hukum ha kaba ïadei bad ki jingpyntip lyngba ka IMD, All India Weather Warning Bulletin kaba la pynmih ha ka 30 tarik u Jymmang 2025, ba ka lah ban don ka jingslap kaba jur ha ki katto katne ki bynta jong ka jylla Meghalaya bad Assam naduh ka 29 tarik u Jymmang 2025.
Halor kane U Deputy Commissioner Cum Chairman DDMA, West Khasi Hills District u la pynmih ïa ka hukum bad bthah ïa ki District Incident Response Teams, ki BDO bad kiwei pat tnad sorkar kiba donkti lang, ba ki dei ban don ha ka jaka kaba ki trei, ban peit pyrman ïa ka jinglong jingman bad ban pyntip kloi sha ka District Emergency Operation Centre, West Khasi Hills District Nongstoiñ, lada don kino kino ki jingjia khnang ban ïoh shimkhia halor ki jingjia kiba lah ban mih na ki bor lyngshop ka mariang.
La kyntu ïa ki BDO ba kin long kiba la khreh bad ban shimkhia kloi, lada don kino kino ki jingjia na ki daw ka bor mariang ha ki Block jong ki bad ban pyntip kloi sha u Deputy Commissioner-cum-Chairman, DDMA West Khasi Hills District.
