Long borabor ki briew kiba don ka mynsiem ban ïarap mar kylliang namar manla ki briew ki don la ki jong ki jingeh: kong C. Dkhar
Mawkyrwat, Risaw 10: Kum shibynta jong ka jingrakhe ïa ka World Mental Health jong u snem 2024, ka ophis jong u District Mental & Health Programme (DM&HP), South West Khasi Hills District ha ryngkat ka jingïatreilang ka Civil Hospital Mawkyrwat bad ka District Legal Service Authority (DLSA), South West Khasi Hills District mynta ka sngi ka la rakhe ïa kane ka sngi kyrpang kaba halor ka phang, “Ka la dei ka por ban buh hakhmat eh ïa ka jingkoit jingkhiah ha ka bor pyrkhat ha ki jaka trei”, kaba la pynlong hapoh ka District Court Hall, South West Khasi Hills District.
Haba kren ha ka jingïalang ka kong C. Dkhar, District and Session Judge, South West Khasi Hills District ka la ïathuh ba ka jingsdang jong ka jingrakhe ïa ka World Mental Health Day ka dei ha u bnai Risaw, 10 tarik jong u snem 1992. Namarkata, haba bynrap ïa ka jingkren ka ong ba kum ki briew ha ka imlang sahlang kaba donkam ka long ki ban don ka mynsiem ban ïarap mar kylliang namar manla ki briew ki don la ki jong ki jingeh jingkhuslai la ha ïing ha sem, ha ki jaka trei kamkum ha ki ophis bad kiwei de hynrei lada ki don ïa ka jing-ïa-ieid i wei ïa iwei ka pynduna ïa kita ki jingeh bad ki jingkhuslai ba ki ki don.
Ka la ong ruh ba ka World Federation jong ka Mental Health ka wanrah ïa ka jingpyrkhat ba la donkam ba kin aiti noh ha kito kiba trei ha ki ophis ne ha kano kano ka kam kaba ki trei ban pyrkhat lem na ka bynta ka jinglong jingman ha ka jingmut jingpyrkhat khnang ba lyngba jong kane ka phang pdeng jong une u snem kaba dei shaphang kiba trei ha ki ophis ne ha kino kino ki jaka ba ki ki trei ba ma ki ruh kin ïoh lem ïa kata jingshimbynta ha ka jingpeit pyrman ha kine ki sngi khnang ba ma ki ruh kin sngewthuh ba ki donkam ïa kaei bad kumno kin ïai pynlong ban ïoh ïa kata ka jaka trei ba sngewtynnad ba kin trei.
Ha kajuh ka por ka la pyni nuksa ruh ïa kaei kaba jia ha ophis ba lada wan kynsan kynsan kino kino ki jingbthah na ki bor ba halor ban pyndep noh mynta mynta ïa ki kam bunsien la ju ïohi ba ki don napdeng ki para nongtrei ki bun jingmut noh namar ki don ka jingsheptieng namar ïoh kim lah ban pyndep ha ka por kaba biang hynrei lada ki sdang da ka jingskhem jingmut ban pyndep ryngkat ka jingïaphylliew jingmut tang kata ka kam ka ïaid beit khlem kano kano ka jingeh. Namarkata, ka Good Stress ka pynïarap ïa u ne ka ba trei ïa ka kam bad pei phang bad sngewthuh ban trei.
Shuh shuh ha kane ka sngi ka la don ruh ka jingpynïalehkai ba la pynïaid da ka kong A. Lyngkhei, Clinical Psychologist bad ka kong B. Snaitang, Psychologist Nurse ha ryngkat u ban A. Shangdiar uba la ai jingrwai. Ka Dr. L. Dhar, Psychologist kaba la kren halor ka phang pdeng, bad ka kong W.L. Marweiñ, Psychiatric Social Worker kaba la kren halor ka Mental Health.
Ha kane ka sngi la ïoh ruh ban sam ïa ki khusnam sha ki khynnah skul kiba jop ha ka jingïakop thoh esse.
Ïa ka jingïalang la pynïaid da u Dr. F.R. Lartang, District Medical & Health Officer, South West Khasi Hills District bud ka jingkren pdiang na ka kong D. Sohtun, MJS, Chief Judicial Magistrate cum Secretary, District Legal Service Authority, South West Khasi Hills District bad jingkren khublei N. Marbaniang, Monitoring and Evaluation Officer, District Mental & Health Programme, South West Khasi Hills District.
Ïa kane kajuh hi ka sngi kyrpang la rakhe da kaba pynlong ïa ka Zumba Session ha Multipurpose Hall DC’c Office, South West Khasi Hills District ha kaba ka kong Dapalei Warjri, Zumba Instructor ka la wan ban pyni ne ban hikai kumno ban lait na ka jingshitom ha ka jingmut jingpyrkhat lyngba ka jingshad bad kumjuh la pynlong ka jingïalang hapoh Civil Hospital Mawkyrwat ha kaba ka Dr. M. Lyngdoh, Medical Superintendent jong ka Civil Hospital Mawkyrwat ka la long kum ka kongsan.