Shillong, Kyllalyngkot 31: Ka lympung ïalehkai phutbol kaba heh tam jong ka Jylla kaba la tip da ka Meghalaya State League kan sa jam sha kaba kut mynta ka sngi Saitjaiñ, ha kaba ka jingïaknieh nam lahduh kan long hapdeng ar tylli ki kynhun ba khlaiñ na Shillong, kata ka Mawlai bad ka Shillong Lajong. ïa kane ka jingïakhun final yn pynlong ha Wahiajer Multipurpose Sports Complex, ïa kaba buh ban sdang ha ka por 1 baje mynsngi.
Lah ban kdew ba kano kano ka jingïakhun hapdeng ka Mawlai bad ka Shillong Lajong ka pynthikna ba kan long ka jingïakhun kaba itynnat bha ban pynshong shit ïa u paidbah ba wan sakhi, kaba kham sngewtynnad ka long ba kane ka jingïakhun final jong ka 4th Meghalaya State League 2024 kan nang pynkhraw ïa ka jingïakhun hapdeng kine ki ar tylli ki klob ba radbah jong ka Meghalaya sha ka kyrdan kaba thymmai.
Kumta kane ka lympung ka la wanphai biang sha ka jaka ba la sdang ïa ka mynta ka samoi, ha ka por ba ka Lajong ka aireng nyngkong pyrshah ïa ka lahduh barim ka Niaw Wasa United naduh u bnai Risaw jong u snem ba ladep. Kane ka lympung kaba wanrah lang ïa ki lahduh naki league jong ki synjuk District kiba la ïasoh bad ka Meghalaya Football Association, ha kaba 24 tylli ki klob ki la ïaid ïa kane ka lynti hynrei mynta ki sah sa tang ar tylli kiba kynsai tam.
Ka Mawlai kam pat ju ïoh ïakhun ha ka final jong ka MSL. Hooid, ka jingïalehkai jong u snem 2023 ka dei ka jingïakhun kaba nyngkong eh jong ki bad ki la shah pynkhyllem noh ha ka semifinal ha ka Khliehmawlieh. Ka Lajong ruh, ka la mad ïa ka namrem ha ka semi final ha katei kajuh ka snem, ha ka Rangdajied United kaba la rah syndon ïa ka burom. Hynrei, kham mynshwa ka SLFC ka la lah pat ban poi sha ka thong, ban rah ïa ka nam lahduh ha u snem 2019 jong kane ka lympung phutbol kaba heh tam ba la kyrshan da ka Sorkar Jylla Meghalaya naduh ba la sdang ïa ka ha u snem 2017.
Kumta ka Mawlai bad ka Lajong kim pat ju ïakynduh pyrshah ha kane ka lympung hynrei ki la ïakynduh teng ha u Naiwieng ha ka Shillong Premier League bad kane ka jingïalehkai ka la kut ha ka jingïakhaid da mar 1-1 kol.
Haba ai jingkren ha ka jingïalang bad ki nongthoh khubor shwa ka jingïalehkai mynta ka sngi, baroh ar ngut ki assistant coach jong ka Lajong bad ka Mawlai, u Bah Milan Nongkhlaw bad u Bah Teibor Dohling ki la pynpaw ïa ka jingsngew skhem ha ka kynhun ban mih madan ha kane ka final mynta ka sngi.
“Ngi la pynkhreh ïa ka snem ba la dep baroh kawei na bynta kane ka khyllipmat,” la ong u Bah Milan Nongkhlaw-Assistant coach jong ka Lajong.
“Ka jingïakhun semi ba ngi ïakynduh (Rymbai Shkenshynriah) ngi la ïalehkai bha bad ki khynnah jong ngi ruh ki la lah ban jubab ïa ka jingtynjuh hynrei ka Mawlai ka dei kawei na ki kynhun ba khlaiñbor bad kawei na ki kynhun ba kynsai tam ha ka jylla. Ngi sngewthuh ïa kane bad ngi long kiba la pynkhreh.”
Na ka liang jong u Rohit Nongspung, uwei pat u dkhot nongpynïaid ka Lajong bad uba la shemphang bha ha ka kam u la don lang ha kane ka jingïalang, ha kaba ula ong ba ka kynhun ka la ïalehkai bha naduh ba sdang, watla ka semifinal ka long kaba kham jwat, ha kaba ka Lajong ka la khur ïa ka jingjop tad haduh ka jingïashut penalty.
Ka Mawlai ruh ka la ïaid lyngba kijuh ki jingïakynduh, ha kaba ka la jop ha ki jingïalehkai Group stage bad ka Quarterfinal da kaba suk shwa ban mad ïa ka jingïakhun kaba jwat pyrshah ïa ka Ladthadlaboh ha ka semi.
“Ha ka lympung ba ladep ngim shym la lah ban poi sha ka final hynrei mynta u snem ka kynhun jong ngi ka la pynkhreh bha bad ngi la long kiba la khreh ban aireng pyrshah ïa ka kynhun kaba khlaiñ bha,” la ong u Bah Teibor Dohling-Assistant Coach ka Mawlai. “Ki player baroh ki long kiba biang bad baroh ki thrang ban jop na ka bynta ka klob bad na bynta ka shnong.”
U Damanbhalang Chyne, u rangïalehkai uba la thep ïa ka shi kol pyrshah ïa ka Ladthadlaboh bad uba la khur ïa ka Player of the Match u la don ryngkatlang ha kane ka sngi, u la ong ba ka kynhun ka la pynkhreh bha bad u coach Hering Shangpliang u la long uba shemphang bha ban ïalam ïa ngi, “Ngi tip ba ngin hap ban ïakhun tyngeh pyrshah ïa kawei na ki kynhun ba khlaiñ jong ka jylla Meghalaya.”
Ïa ka tiket na bynta ka final yn sa ïoh na katei ka jaka bad ïa kane ka jingïakhun yn sa pyni live ruh lyngba ka Hello Meghalaya app.
