Thimphu (Bhutan), Nailur 27: Ka India kan ïakhun pyrshah ïa ka Nepal ha ka semi-final jong ka lympung U17 SAFF Championship 2024 ha kane ka Sngi Saitjaiñ. Lah ban kdew ba ka kynhun ïalehkai jong ka ri ka la rung suk sha ka wat ïakhun Semi final kum ka lahduh na ka Group A hadien ba jop baroh ar sien lynter ki jingïalehkai, ïa ka Bangladesh da 1-0 kol bad ïa ka Maldives da 3-0 kol, ban khur pura ïa ki hynriew point.
Ha kawei pat ka liang, ka Nepal ka la ïohrung da ka said sha ka semi-final hadien ba jop ïa ka Bhutan ha ka jingïakhun ba khadduh na ka Group, kaba la kyntiew kyrdan ba ar ïa ka ha ka Group B shadien ka Pakistan, ka ban aireng ïa ka Bangladesh ha ka semi-final ba ar ha kane ka Sngi Saitjaiñ.
Ka India ka la ïoh jingpynjahthait kaba paka hadien man ki jingïalehkai jong ka haduh mynta, kynthup ïa ki lai sngi ba pura ban pynkhreh ïa ka semi final. U coach ba rangbah jong ka kynhun, u Ishfaq Ahmed u la pynpaw ba kaba kongsan ha ki sngi shongthait ïa ki player ka long ba kin ïoh biang ka met ka phad kaba khlaiñ khlem jingmynsaw.
“Kane ka jingshong pynjahthait barabor ka long na bynta ban ïohbor biang namar Ngi ïalehkai ha ki madan phlang plastik (artificial turf). Kam long kaba suk ban ïalehkai bad kilanmet ha kum kine ki madan (artificial turf) man ka sngi. Ka don ruh ka jingktah kaba pynsniew. Ngi kilanmet barabor ban ïoh ka met kaba koit kaba khiah na bynta ki khynnah lehkai jong Ngi.
“Ka jingjaw slap hangne ka long man ka sngi bad Ngi la sahkut hapoh hotel. Teng teng kane ka lah ban long kaba bha namar phi ïoh ban pynlut khambun por ryngkatlang bad kane ka ïarap. Ka bynta ba sngewtynnat tam ka long ba ym shym la don kino kino ki jingmynsaw bad Nga sngewnguh ïa u Blei ba baroh ki player ki don ryntih ban shah jied,” ong u Ahmed.
Haba phaidien, ka India ka la jop ïa ka Nepal da 1-0 kol ha ka jingïalehkai group stage jong ka SAFF U16 Championship ha u snem ba ladep, ha kaba ïa kane ka shi kol la thep da u Md Arbash. Katba ka Nepal ka la shah pynkhyllem na ka lympung khlem da ïoh pynkhihjar 12 bnai mynshwa, hynrei mynta ka paw ba ki la don katto katne ki jingkylla ha ka rukom ïalehkai. U Sujan Dangol un long uwei na ki rangïalehkai ba ki bak ka India ki hap ban peitbha, u dei u player ba ïoh thep bun kol tam mynta u snem da saw kol, kynthup ïa ka hat-trick pyrshah ïa ka Sri Lanka bad ruh ka shi kol kaba kongsan pyrshah ïa ka Bhutan.
“Nga kheiñ ïa ka Nepal kum ka kynhun kaba tbit. Kim ju tieng ban ïakhun. Ki la ïalehkai bha, ban wanphai wat hadien ba shah lamkhmat 0-1 kol, kaba pyni ïa ka jingtbit bad ban pynliem ïa ka ri ba pynlong ïa kane ka lympung,” ong u Ahmed.
“Namar kane ka dei ka jingïakhun knockout, phi hap ban long kiba husiar bha bad ban shim ïa ki kabu jong phi. Ha baroh ar tylli ki jingïalehkai, Ngi la lah ban thaw shibun ki kabu hynrei kiba bun Ngim shym la lah ban pynurlong. Lada dei ba shah khanglad ha u rangapkol ne kaba lait sharud, kam pher. Ngi donkam ban pynurlong ïa ka jinglah ban tehlakam ïa ka bol sha ki kol.
“Lada Ngi ïoh pynkhih kham kloi pyrshah ïa ki, kan kham suk ïa Ngi. Ngin nym kwah ïa ka jingïakhun (pyrshang thep kol) ba kan slem namar hangta phi hap ban phikir bad husiar ha bak ruh kumjuh. Te kumta, Nga tharai kane ka dei ka kabu ïa ki khynnah lehkai jong Ngi ban pynpaw biang ïa ka jingtbit jong ki,” la bynrap u Ahmed.
Na bynta ka Nepal, ka kynhun ka la durut tyngeh ban wanphai biang. Hadien ba shah rem da 0-1 kol ha ka Pakistan, ka la jubab da kaba jop 4-0 kol ïa ka Sri Lanka, hadien nangta ka la wanphai nadien ban pynliem ïa ka Bhutan da 2-1 kol.
“Ngim don shuh da kano kano ka lad lait satang ban jop. Ngi la pyni ïa ka jingmut jingpyrkhat jong Ngi ban jop ïa ki jingïakhun bad Ngi la lah ban wanphai biang,” ong u Head coach ka Nepal – u Sanoj Shrestha.
“Ka Nepal bad ka India – baroh ar ki dei ki kynhun kiba tbit. Nga khmihlynti ïa ka jingïakhun kaba mar ïabiang (50-50). Ngi la ïohi ïa ki jingïalehkai ba ladep jong ka India, bad Ngin sa shim katto katne k jingthmu katkum ka rukom lehkai kaba ngi la sakhi. Ngi kyrmen ïa ka resol kaba bha,” la bynrap u Shrestha.
