Leit tynruh ka HYC ha u DC ba suba thungkam khlem dei ha tnad DRDA
![](https://mawphor.com/wp-content/uploads/2022/05/mawphor-1-1.jpg)
Nongstoiñ, Nailar 24: Ka Hynñiewtrep Youth Council West Khasi Hills District hapoh ka jingïalam u Samla Lumlang Kharsyiemlieh President, ka la leit ïakynduh ïa u DC ka West Khasi u Sahep Garod LSN Dykes, halor ka jingud ki samla bad ki kmie kpa ki samla wad kam ïa ka ba aplai ïa ka post Technical Assistant ha DRDA.
Ka seng ka ong ba la khot advertisement ha ka 24.8.2022, ha kaba haduh 58 ngut kiba thep bad ka Screening Committee kaba ha ka 16 Lber 2023 ka la jied 7 ngut ban leit sha ka Personal Interview.
Hynrei ha ka Notice kaba mih ha ka 6 Naitung 2023, la bthah pat ban don ka Written Examination ha ka 19 Naitung 2023. Hynrei kaba sngew lyngngoh pat ha ka por thoh exam mih ruh ki bym don ha ka list ba la dep jied da ka Screening Committee.
Ha ka Notice kaba la pynmih ha ka 1 tarik Nailar 2023 la jied 3 ngut, kata ki bym don ha ka list ki poi ha Final interview, kane ka la pynlyngngoh shisha, ong u Bah Lumlang Kharsyiemlieh President ka seng.
Kumta ka seng ka la pan jingshai na u DC u ba dei u District Programme Coordinator (DPC) u ba dei ruh u Chairman ka DSC.
Na ka liang u DC u la ong ka jingbym phah direct ïa ki sha interview kumba ka long, namar ka donkam 1/3 Ratio ha ka kan thep kam katkum ka kyndon. Dei na kata ka daw hap phah thoh Examination.
Ïa kata kaba mih tam ha ka list ban thoh Exam ba la don 7 ngut, un sa wad bniah bad shimkhia. Hynrei ïa mynta um pat ong ei ei, un sa ai ka jubab kham hadien namar ki don kiwei pat kiba pynïaid nalor jong u, namar kam pat interview ïa katei ka post Technical Assistant. U DC u ong u kwah kaba DSC kan ai jingshaniah sha ki samla pule donkam ïa ka jingïatreilang.