Jowai, Naitung 10: Ka Jaiñtia Students’ Movement (JSM) Central Body mynta ka sngi kala leit tur sha phyllaw ka Jaiñtia Autonomous District Council (JHADC) ban dawa weng noh mardor ïa ka Entry Tax Gate jong ka Karbi Anglong Autonomous Council (KAAC) kaba lah buh naduh 15 tarik u April hapoh ka Shnong Khanduli West Jaiñtia Hills.
Dang ha kane ka 30 tarik u Jylliew kala dep ban ai da ka jingthoh ha u Deputy Commissioner ka WJHD bad sha u CEM ka JHADC ban weng noh ïa katei ka jaka lum khajna Tax Gate na Khanduli hapoh 10 sngi, hynrei katei ka Tax Gate ka dang don haduh mynta, ong ka seng.
Na ka liang u samla N. Ribok Biam President ka JSM Western Region ula ong kine ki MDC hapoh ka JHADC ki long tang kum ki lun ki bym don ktien ban kren ïa ka jingeh ki paidbah bad ka seng ka pynrem jur ïa kane lada ïa nujor bad ki MDC ka KAAC. Ula kren shai lada ym pat lah ban weng ïa katei ka Tax Gate ka seng kam shong kli kti bad kan sdang ïa ki jingïakhih nangne shakhma.
U Education Secretary Central Body u samla Wellson Siangshai u ong ka jingmih jong ki mynta ka sngi ka long ban dawa ïa ka hok, halor ka jingeh ki paidbah nongsong shnong ha khappud, kum ka seng kala pynbeit lada ym lah ban weng ïa katei ka Tax Gate naduh lashai yn pynlong da ka jingshong kylliañ mynngor.
Katba u Secretary ka Shnong Khanduli ma Helme Slong ula ai khublei ïa ka JSM kala la shim ïa kane ka bynta ban dawa weng ïa ka Tax Gate jong ka Assam namar kiba bun ki nongrep kiba rep na katei thaiñ kila duh noh ïa ka kam rep kam riang naduh ba don katei ka jaka lum khajna. Ula kyrpad ïa ki MDC ka JHADC ba kin shim khia ïa kane bad ban wanrah biang ïa ka shongsuk shong hngaiñ kumba long ha ki por mynshwa. Shuh shuh ula pynsngew kumba long mynta na ka liang ka Shnong ka dang khang ïa ka rung ka mih hapdeng kine ki ar jait bynriew (Pnar bad Karbi).
