Nongstoiñ, Rymphang, 23: Ka Khasi Students Union Lyngngam Hynneng Brei Unit hapoh ka jingïalam jong u Samla Banshan Sohbar General Secretary, ryngkat ka jingsynran lang u Samla Jonathan Puweiñ Finance secretary, u Samla Franky Mawsor Assistant Education Secretary lem bad ki dkhot, ka la ïoh ban kner jingïarap sha ar tylli ki lanot pluh ïing.
Kawei ka dei ha ka Shnong Langshongthiang ba dei jong ka Kong Onjo Mawsor bad u Bah Klaiñ Riangshiang. Kawei pat ha ka shnong Riangna ba dei jong ka Kong Agnes Riangshiang bad u Bah Pital Mawsor.
Ka seng kum ka jingsngewlem ïa ka jingjia ka lah synñiang da ki marbam, ki tiar shet tiar tiew bad ki jaiñ kup. Haba ai jingkren U Samla Banshan Sohbar u lah pynpaw ïa ka jingsngewnguh ïa u Blei, ba u lah pyllait ïa kine ki longïing na kino kino ki jingmynsaw ne jingjia ba sngewsih. Hynrei ka seng ka sngewdiaw bad pang nud ha kaba kane ka longïing ka la duh noh ïa ka ïing sah bad ïa ki jingdon jingem jong ki.
Shuh shuh u General secretary u la pynpaw ba kum ka seng ba peit pyrman ïa ka bha ka miat jong ka dong ka thaiñ, kam lah ban shu peit lane shong kli kti. Hynrei, ha I bor barit ka seng kan ïai pyrshang ban ïarap ïa ki paradoh lada ki ïakynduh jingeh la ha kino kino ki bynta.
Ka seng ha kajuh ka por ka kyntu ruh ïa ka Sorkar bad ïa ka tnad ba dei peit, ba kan pynkloi ïa ki lad jingïarap khnang ba ki lanot ba jia ka jingjia ba sngewsih, kin ïoh ïa ki lad jingïarap ha ka por kaba biang.
