Shillong, Nailur 28 : U Symbud Lamphang jong ka Iing Dorbar Thawaiñ ka jylla, u Timothy D Shira ryngkat u Commissioner & Secretary ka Iing Dorbar Thawaiñ ka Jylla, u Dr.Andrew Simons, ki laleit ban shim bynta ha ka 21st Annual Conference jong ka Commonwealth Parliamentary Conference, India Region, Zone III kaba long ha Aizawl, Mizoram ha ka 27 bad 28tarik mynta u bnai.
Ïa kane ka lympung jingkynduh lang la wan ban plie da u Lamphang ka Lok Sabha, u Om Birla uba dei ruh u Chairman jong ka Commonwealth Parliamentary Association, India Region.
Ki mat kiba ïatai ha kane ka Conference ki kynthup ïa ka jingkynthup lang ïa ka North East Region ha ka India-ASEAN Vision na bynta ka Khaii Pateng bad ruh ban pynïasoh ïa ka Ministry of Doner bad ka NEC na bynta ka jingdon ïa ki plan kiba biang bad ka jingïatrei lang na bynta ki projek bapher bapher kiba wan ha kane ka thaiñ.
Na ka liang u Symbud Lamphang ka Jylla ruh u la shim bynta shitrhem ha ka jingïatai ha baroh ar tylli ki mat ïatai da kaba ai jingmut ruh shibun na bynta ka jingmyntoi jong ka thaiñ.
Katba na ka liang u Dr. Andrew Simons u la wanrah ïa ka kaiphod kaba bniah kaba pyni ïa ki kam bad ki jinglah jong ka CPA Region Zone III naduh ka conference kaba la dep.
La ïa shim bynta lang ha kane ka sngi naduh u Harivansh Narayan Singh, Deputy Chairman, Rajya Sabha, Sharingain Longkumer, Lamphang ka Nagaland Assembly bad Chairman jong ka India Region Zone – III, Lalbiakzama, Lamphang ka Mizoram Assembly, Lalduhoma, Myntri Rangbah ka Mizoram ryngkat u Lamphang bad Symbud Lamphang na ka thaiñ shatei lam-mihngi jong ka Ri kynthup ruh ïa ki MP bad ki MLA.
