Shillong, Naitung 16: Hynne ka Sngi Hat Majai ka 16 tarik, Nailar, 2023 u khlur ak phlim ba pawnam jong ka Bollywood, u John Abraham u la wan ban ïuhkjat ha madan ïalehkai jong ka Sport Authority Of India, kaba ha NEHU, Shillong ban ïakynduh kyrpang ïa ki rang bad ki thei ïalehkai ba kynsai kiba la shah jied ha ka Super Elite Pathway Programme, 2023, kaba la pynïaid da ka Meghalaya State Olympic Association (MSOA) ryngkat ka jingïatreilang bad ka tnat ba dei khmih ïa ka kam ïalehkai jong ka sorkar jylla.
Ha kane ka sngi la ïadon rynglang bad u Ian Campbell jong ka ri Australia bad ruh u President jong ka MSOA, u Bah John F Kharshi-ïing bad kiwei kiwei.
Ha ka jingwan jngoh ka jong u ïa kine ki khynnah lehkai ka jylla, na ka liang jong u John Abraham u la ïaroh ïa ka sap ba kine ki khynnah ki don, bad ruh ïa ka MSOA kaba la trei shitom ban wad ïa kiba kum ki khynnah kiba don ïa ka sap ha ki jingïalehkai bapher bapher.
Shuh shuh, u John Abraham u la ai mynsiem bad pynshlur ruh ïa kine ki khynnah kiba la shah jied ha ka thup jong ka Super Elite Pathway Programme, 2023 ba kin dang trei shitom bad ban pyn janai shuh shuh ïa ka sap kaba ki don khnang ba kin lah ban poi sha ka thong kaba ki angnud.
