Shillong, Naitung 06: Hynne ka sngi ka 6 tarik u Naitung 2024, ka Khasi Students’ Union Mawlai Circle hapoh ka jingïalam jong u Samla Badon Malngiang, Sport Secretary ka Circle ka la ïoh ban leit kitbok kitwriang ïa u Samla Manbhahkupar Malngiang u ban leit kilanmet sha Srinagar na ka bynta ka jingpynkhreh ban shim bynta haka kynhun Under -17 jong ka South Asian Football Federation (SAFF) Men Championship ka ban long hapoh Ri Thailand.
Hakane ka sngi ka Seng ka lah ïoh ban leit ai mynsiem bad kitbok kitwriang ïa une u Samla hapoh ka ïing sah ka jong u, na ka liang ka Seng ka lah pynpaw ïa ka jingsngewkmen ban ïohi ba napdeng ka thup ki 31 ngut ki ban ïoh leit pyntbit ïalade na ka bynta ka jingpynkhreh ïa katei ka lympung ïakhun.
Ha kane ka kynti la sakhi ba 2 ngut ki samla khasi ki shah jied ban rung hapoh ka thup jong kitei ki 31 ngut ki dkhot player bad lyngba kane ka Seng ka sngewdei eh ban kitbok une u Samla bad ha ryngkat ka jingkyntu bad jingkyrmen skhem ba une u Samla un nang ïai kiew nang ïai trei shitom bad kumjuh ban ïai kiew shakhmat ha ka sap kaba u don.
