Leit jurip u Lamphang ïa ka jingtei ïa ka ïing Dorbar thymmai lap ba ym lah ban pyndep ha ka por ba la buh

Shillong Risaw 31: U Lamphang ka ïing dorbar thawaiñ ka jylla u Thomas A Sangma ha ka sngi Palei, ula leit jurip ïa ka jingtei ïa ka ïingdorbar thawaiñ bathymmai jong ka jylla kaba don ha Mawdiangdiang bad hadien kane ula lum ruh ïa ka jingïalang bad ki tnad bapher bapher kiba don bynta ha katei ka kam.
Ha kane ka jingjurip la ïadonlang u Commissioner & Secretary u Dr. Andrew Simons, u Secretary u Malthus Sangma bad ki ophisar jong ka Meghalaya Assembly Secretariat nalor kiwei pat.
Ha kane ka jingjurip u Lamphang ula bishar bniah ïa ka jinglong jingman ki kam ki jam jong ka Main Hall ha kaba ka jingpynïeng ïa ki tiar kiba dei da ki nar ka dang ïaid shakhmat.
Na ka liang u Lamphang ula pyntip ba ka la don ka jingbud ryntih ïa baroh ki kyndon katkum ka Standard Operating Procedure (SOP) ban pynthikna ïa ka jingshngaiñ jong ki nongtrei bylla bad ka jingshngaiñ jong ka jingtei baroh kawei, hynrei la pynleit jingmut bha na ka bynta ka jingshngaiñ jong ki nongtrei bad ïa ka jinglong jingman bad jingskhem jong ka jingtei.
U Lamphang ula ong, ba ka jingïaid shakhmat jong ki kam ki jam baroh ka long kaba hun hynrei kane ka projek ka la ïaid palat ïa ka por bad ka la tam shi bnai na ka por kaba la buh.
U la banjur ïa ka jingkongsan ban pyndep ha ka por kaba la buh thymmai bad kan ym don shuh kano kano ka jingai por biang. “Ka jingtei ïa ka building ka la poi sha ka bynta kaba khatduh, ha kaba la pyndep haduh 90% ïa ki bynta kiba don ha ka liang kamon bad ka diang, ka ophis u Lamphang, ka kamra treikam u Myntri Rangbah, ka Secretariat office bad ka Library kidei kiba la jan dep artad.
Katba ka bynta kaba hapdeng ka ban kynthup ïa ka Main Hall kadei kaba dang sahteng ban pyndep,” la pynpaw u Lamphang.
Ula pyntip ruh ba u contractor bad ka PMC ki la pynthikna ba ka jingtei ïa ka Dome yn ïaleh ban pyndep hapoh kine ki 45 sngi ki ban wan, ka ban long syndon ka jingtei pyndep ïa ka building baroh kawei.