Shillong, Jylliew 27: Hadien ba ki la tip ba u MLA u la dep ban wanphai na ki jingshah sumar, na ka liang ki dkhot ka Mawkhar Dorbar Shnong ryngkat u Rangbah Shnong Bah Ransom Sutnga ki la ïoh ban leit jngoh ïa u MLA ka North Shillong Bah Adelbert Nongrum u ba la shah sumar bad wan phai ruh na ka jingshah sumar ha kine ki sngi na CMC Vellore.
Hadien ba ki la ïohi ïa u MLA ka thaiñ ba u la kham khlaiñ ki dkhot ka Dorbar Shnong ki la pynpaw ka jingsngew kmen kaba khraw haduh kata kata ban shem pat ïa u nongmihkhmat ka shnong ha ka jingkoit jingkhiah hadien ba la ïoh ka jingsumar na katei ka jaka sumar.
Ha kane ka jingleit jngoh bad kitbok kit rwiang ki dkhot ka Dorbar Shnong ki la ïoh ruh ban buh ha ki jingduwai bad ban ainguh ïa U Blei namar ki jingisynei bad ki jingbha jong U u MLA ka shnong u la ïoh ka jingsumar kaba biang bad paka.
“Ka la long shisha ka kambah U Blei kaba U la plie ka lad lyngba ka Sorkar Meghalaya bad ka jingshim khia U Myntri Rangbah ka jylla Meghalaya u Conrad Sangma ban rah da ka Air Ambulance kloi kloi sha CMC Vellore wat hapdeng ka jingshitom kaba jur. Ka Dorbar Shnong sa shisien ka ai ka jingduwai bad ka jingkitbok ïa u MLA ban nangïoh noh ka bor ba pura khamtam eh na ka bynta ka jingshakri ïa ki paid nongshong shnong kaba dang donkam bun ki lad pynroi da ka jingïatreilang ki dkhot ka Dorbar Shnong na ka por sha ka por hadien ba u la lah biang ban trei ïa ka kam shakri paidbah,” ong u Bah Ransom Sutnga.
