Nongpoh, Risaw 07: Ki nongïalam jong ka Hynniew Trep Youth Council (HYC), Ri-bhoi District, hapoh ka jingïalam u Samla Tony Shylla kum u Secretary bad u Samla RC Thankhiew kum u Vice President, ryngkat ka jingsynran lang bad ki nongïalam ka Meghalaya People Social Organisation (MPSO), mynta ka sngi ki la leit jngoh ïa ki 5 tylli ki longiing ha shnong Nongspung B kiba la shah pynjulor ka iing ka sem namar ka jingwan tuid ka khyndew bad shyiap na ka jingtih khyndew jong u riew shimet ha katei ka shnong.
Kitei ki 5 tylli ki longiing ki kynthup ïa ka Kong Lijanta Sungoh, Kong Premika Sungoh, Kong Wompher Dhar, Kong Mana Suting, bad Kong Kerning Sungoh, kiba la shah pynjulor ki iing jong ki bad la hap ban leit sah shawei.
Naka liang kitei ki longiing ki la kyrpad na u trai ka jaka ba tih ïa u lum ba un hap ban bah khlieh ha kaba ïadei bad ka jinglut ban pynbha biang ïa ka iing ka sem jong ki nalor ki jingthung jingtep bala julor bad shah ktah ha katei ka shnong.
U Rangbah Shnong ka Nongspung B, u Bah Philimon Tongper, u la ong ba ka jingshahktah ïa kitei ki longiing ka sdang ha u bnai ba 5 ne ba 6 ha ka por slap jur, ha kaba ka khyndew kaba tih na u lum ka la tuid haduh ki iing jong ki, haduh ba kim lah shuh ban sah. Kane ka jingwan tuid ka khyndew ka la pynjulor ruh ïa ki jingthung jingtep jong ki nongshong shnong, bad ka la long kaba jynjar ruh ban pynkhuid ïa ka.
U Rangbah Shnong u la ong ruh ba kitei ki longiing ki la hap ban iehnoh ïa ki iing jong ki namar ka jingjot ka la palat bad ki la dawa na riew shimet u ba ba tih ïa u lum u dei ban kitkhlieh ïa ka jinglut.
U Bah Tony Shylla, haba kren sha ki lad pathai khubor, u la ong ba mar ïa ioh jingtip halor kane ka jingjia lyngba ki lad pathai khubor, ki nongïalam ka HYC kim lah ban shong kli kti. Ki la mih sha katei ka shnong ban peit hi ïa ka jingeh jong kitei ki longiing.
U Bah Tony Shylla u la ong ruh ba hadien ba ki la ïa kynduh ia kitei ki longiing, la lap ba ki dei kiba im da ka rep riang, bad ki la ioh ruh ban ïa kynduh ia u trai ba pyntih khyndew ha kaba ki la dawa ba u dei ban bah khlieh ïa ka jinglut jingsep jong kitei ki longiing.
Naka liang utei u trai ba pyntih khyndew u la kular ban ïarap ïa kitei ki longiing bad ban pynshna da ki kynroh ba thymmai ban khanglad ïa ka khyndew ban nym tuid shuh shapoh iing.
