New Delhi, Nailar 05: Ka kynhun ki Nongïalam ka National People’s Party (NPP) na Meghalaya bad ki MLA ka party na Manipur ba la ïalam da ka MP Lok Sabha ka Agatha Sangma, ki la ïakynduh ïa u Myntri kam Pohïing ka Ri u Amit Shah hapoh ka Ophis jong u ha Parliament House ha ka sngi Thohdieng bad kyrpad ba un leh eiei noh ha ka ban lah wanrah pat ïa ka jingshong suk ha Manipur.
Kane ka kynhun ka kynthup ïa u MP ka Rajya Sabha Dr Wanweiroy Kharlukhi na Meghalaya, u M Rameshwar MLA ka NPP na Kakching AC Manipur bad u Nurool Hassan,MLA ka NPP na Khetrigao AC Manipur. Ha kane ka jingïakynduh, ka kynhun ka la aiti ruh ïa ka rai ba la shim hapoh ka jingïalam u Conrad K Sangma, National President ka NPP bad Myntri Rangbah ka Jylla Meghalaya bad ba la soi lang da ki MLA ka Manipur bad Bah Prestone Tynsong National Vice President bad Symbud Myntri Rangbah ka Jylla Meghalaya nalor u James Sangma National General Secretary ka NPP.
Ka kynhun ka la kyntu ïa u Myntri ba un shim noh mar mar ïa ki sienjam ha ka ban wanrah pat ïa ka jingshongsuk shongsaiñ ha Manipur.Ka jinglong jingman ha Manipur ka la wanrah ïa shibun ki jingeh ïa ki trai shnong bad ka kynhun ka la kyrpad ïa u Myntri kam Pohïing ba un tuklar lem ha ka ban pynïoh ïa ki song jingïarap ban pynthikna ïa ka jingshngaiñ bad ka kamai ka kajih jong kito ki briew kiba shah ktah.
Ka kynhun kala kular ruh ba ka NPP kan ai kat kaba lah ïa ki jingïarap ha ka ban lah wanrah pat ïa ka shongsuk shongsaiñ ha Manipur bad ban ai jingïarap ha ka liang ki tiar bad marbam na ka bynta ki lanot ba shah ktah ha kane ka jingjia ha Manipur.
