Khliehriat, Jylliew 28 : Hynnin ka sngi, ki nongialam bad ki dkhot jong ka East Jaiñtia Hills Truck Owner and Transporters Association (EJHTO&TA), ba la lam khmat da u President, u bah Kyrshan Dkhar, ki la leit ban ïakynduh ïa u heh jong ka company dewbilat, Topcem Company, u R.K.Pareek, uba dei ruh u President jong ka All Jaiñtia Hills Cement Manufacturing Association (AJHCMA) kaba don ha Thangskai bad ki la ïakren halor ka jingduna palat ka jingsiew ïa ki trok kaba dei ka bai kit jingkit.
Na ka liang ka Association ka la dawa ba ki company dewbilat kiba don ha East Jaiñtia Hills District ki dei ban pynbiang ïa ka bai kit bai bah jong ki trok ha ka dor kaba biang na ka bynta ban ïa im lang bad ban lait ruh na ka jingshah khñoit dor palat.
Na ka liang u bah Kyrshan, u la ïathuh ba kane ka jingiakynduh ïa ki heh jong ki kharkhana ka dei namar ba ki trai trok bad ki nongñiah trok ki ju ïakynduh jingeh shibun namar ba kim ju kham ioh ka jingkit ne ka load kaba biang, kumta kane ka jingiakynduh ka long ruh ba ki la dawa na utei u heh jong ki karkhana dewbilat ba baroh ki karkhana dewbilat ki dei ban pynbiang bha ïa ka jingsiew ha kata ka dor ban ïa im lang khnang ba kan nym wanrah jingioh nong tang ïa ki hynrei ka ban wanrah jingiohnong ruh ïa ki trai trok bad ki nongñiah trok.
La ong ba na ka liang u R. K. Pareek u la ong ba kane ka jingwan jong kane ka Association mynta ka sngi ka dei kaba long kyrkieh palat ha kaba na ka liang ka Association jong ki karkhana kam pat shym la pynkhreh eiei ban shim ïa ka rai halor kane ka jingdawa jong ki, namar kane ka shu long hak dak, kumta utei u heh jong ki Company u la kyrpad ïa ki nongïalam bad ki dkhot jong ka East Jaiñtia Hills Truck Owner and Transporters Association ba kin wanrah ryngkat lang bad ka jingthoh bad hadien kata na ka liang ka All Jaiñtia Hills Cement Manufacturing Association (AJHCMA) kan sa shong ban ïa bishar bha bad kin sa shim ïa ka rai.
