Leit bud dien u Myntri Rangbah sha Delhi halor ka jingkyntiew kyrdan ïa ka NEIGRIHMS

Shillong, Lber 01 : U Myntri Rangbah ka jylla u Conrad K Sangma mynta ka sngi Thohdieng, ula leit bud dien bad ïakynduh ïa u Myntri ka Sorkar Kmie uba khmih ïa ka koit ka khiah ban dawa ban pynlong noh ïa ka North Eastern Indira Gandhi Regional Institute of Health and Medical Sciences (NEIGRIHMS) Shillong kum ka Medical Centre kaba kongsan tam ha baroh kawei ka thaiñ shatei lam mihngi.
U Conrad Sangma ula shim khia ban tynruh na ka sorkar pdeng ban kyntiew kyrdan noh ïa ka NEIGRIHMS sha ka jaka pule kaba kongsan hapoh ka ri.
Ha ka Shithi, kaba u Myntri Rangbah ula phah sha u Myntri ka Koit ka Khiah u Dr Mansukh Mandaviya ha ka 1 tarik u Lber, ula ban jur ba ka NEIGRIHMS ka la long ka jaka ai jingsumar kaba kongsan tam ïa ka jylla Meghalaya bad kaba ai jingkyrshan ruh ïa kiwei pat ki jylla kiba don marjan ha ka thaiñ shatei lam mihngi.
“Ka NEIGRIHMS ka don jingthmu ban pynïar, da kaba buh ïa ki jingmut jingpyrkhat ban pynïar ïa ka jingai jinghikai ïa ki samla pule ha ka Medicine, Nursing bad kiwei kiwei ki Course kiba ïadei bad ka koit ka khiah. Kane ka jingpynïar, ka ïaid ryngkat bad ka mishon ka jong ngi ban kyntiew ïa ki lad ha ka pule puthi ha Meghalaya. Ha kane ka khyllipmat kaba kongsan, ka sorkar Meghalaya ka ai ka jingtyrwa ban kyntiew kyrdan noh ïa ka NEIGRIHMS sha ka jaka pule kaba kongsan tam. Kane ka sienjam ka ban shim, ka bat ïa ka jingkular ban wanrah ïa ka jingriewspah kaba ïar ha kane ka jaka pule ka ban long ka jingsngew sarong ïa ka jylla Meghalaya” ong u Myntri Rangbah.
U Myntri Rangbah ula pynpaw ruh ba kane ka jaka ai jingsumar bad jaka ai jinghikai kan wanrah ïa ka jingkylla, ka ban ai jingmyntoi ïa ki nongshong shnong ka Meghalaya bad ïa ki paidbah jong ka thaiñ shatei lammihngi jong ka ri India.
U Conrad ula pyni ruh ïa ka histori jong ka NEIGRIHMS kaba la tei hapoh jongka Meghalaya Registration of Society Act 1983 da ka Sorkar India ha u snem 1987 bad ka ïeng kum ka Autonomous Institute ha nongbah Shillong.