Mawkyrwat, ‘Naitung, 14: U President Rangbah jong ka Hynñiewtrep National Youths Front (HNYF), u bah Sadon Blah kum shi bynta ban pynkhlaiñ ia ki mat treikam jong ka seng na ka bynta ki daw bah jong ka ri bad ka jaitbynriew u la hiar ba ai mynsiem ïa ki nongïalam bad ki dkhot jong ka HNYF Southern Border Area kata naduh na ki thaiñ Mawsynram, East Khasi Hills District shaduh sha ki thaiñ Maheskola, South West Khasi Hills District.
U Bah Sadon Blah, haba kren ha ka jingïalang u la pynpaw ka jingsngewkmen ba ka HNYF ha ka thaiñ Mawsynram ka la khlaiñ mynta da ka jingsngewthuh ba ki dkhot ki ban kit ïa ka lyngkor na ka bynta ka jaitbynriew ki la sdang ban mih shakhmat.
Ha kajuh ka por u la kyntu ruh ïa ka sorkar ba lyngba ki tnad ophis bapher bapher ha ka thaiñ la lap ba ka dei kaba dang sahdien tam kaba dang duna shibun ki jingdonkam lada phai ha ka liang ka surok, ka koid ka khiah, ha kaba ïa dei bad ki jaka pule ka dangle. Namarkata, ka Sorkar kan dei ban pynbiang mardor ïa kine khnang ba ki paidbah kin ym don kino kino ki jingeh.
Shuh shuh u la kyntu ruh ia ki dkhot jong kane ka shnat treikam ka HNYF ha Mawsynram ba kin ym iakyrsum ha ka saiñpyrthei bad ban kiar ban leh na kino ki kam be-aiñ hynrei ban ai ka jingtreilang bad ki bor synshar shnong na ka bynta ka jingmyntoi jong ki paidbah ba bun balang.
Ha kane ka sngi la ïa don lang naduh u President jong ka HNYF jong ka Southern Border Area, u bah Kyllang Thongni, u bah Drimshon Mawlein, General Secretary ha ryngkat kiwei ki dkhot napoh ka Executive Committee Central Body, ki ‘riew rangbah, ki samla kiba wan pynïasoh thymmai ha kane ka Seng HNYF bad ïa kane ka jingïalang la pynlong ha Rt. Mawksiar Mawsynram, East Khasi Hills District.
