Leit ai mynsiem ka JNC ïa ki dkhot ka MCTODA, sngewkhia halor ka jingshah kem ki nongïalam

Khliehriat, Naiwieng, 08 : Ki dkhot ka Jaiñtia National Council (JNC) Central Executive Committee ha ka sngi Thohdieng ki la leit ban ai mynsiem ïa ki dkhot jong ka Meghalaya Commercial Trucks Owners and Drivers Association (MCTODA) bad pynpaw ruh ka jingsngewkhia halor ka jingshah kem ki nongïalam kiba hakhmat jong ka MCTODA.
U President ka seng Bah Sambormi Lyngdoh ha u kyrwoh ba la phah sha ki lad pathai khubor u la ong, kum ka seng kaba peit ïa ka bha ka miat jong ka jaitbynriew kam lah ban shu long tang ki nongpeitkai khamtam ha kaba ïadei bad ka jingshah kem jong ki nongïalam ka MCTODA.
“Ngi ïohi ba kane ka la jia hadien ba uwei u bar jylla uba dei u heh jong kawei ka kompeni u Devendar Bansal uba la maham ban phah kem ïa ki dkhot ka MCTODA bad kane ka jingmaham jong u heh ka kompeni ka la kylla long pynban kum ka jingïathuhlypa ïa kaei kaba ka tnat Pulit kan sa leh ïa ka MCTODA. Ïa kane hi na ka liang ka seng kam lah ban pdiang da leilei bad hadien ngi la shong ïa ka jingïalang jong ka CEC ngi la rai ban ngin sa shim ïa kano kano ka sienjam khamtam ïa kita ki bor kiba pyrshang bad ïaleh ban ïuhroit ïa ngi kum ki trai ri, trai muluk,” u la ong.
Ka seng ka la pynpaw ruh ba ha ka jingleit jngoh ïa ki dkhot jong ka MCTODA ha Mawryngkneng ka la ïohlad ban tih bniah ïa ka daw tynrai bad la shem ba ka jingong jong ka Sorkar ba ladep ban ai ïa ka bai kit ïa ki trok kiba kit ïa ki mar ki mata na ki karkhana dewbilat kan long katum ka dor ba la buh da ka Sorkar. ‘Haoid, ka lah ban long ïa ki katto katne, hynrei kaei kaba ka seng ka lap ba kam shym long salonsar katkum ka rai jong ka Sorkar. Na kane ka daw sa nang bteng ïa ka jingïakhih, lada jin ba kine ki kharkhana dewbilat ki pyntreikam ïa kata ka dor ba la buh da ka Sorkar kaba treikam ïa baroh ka Association ruh kan ym pynlong hi ruh ïa ka jingïakhih,” ong u kyrwoh.
“Haba ngi pyrshang ban wad shuh shuh ïa ka daw tynrai ha ka jingïakren bad ki nongïalam ka MCTODA ngi shem ba ka dawbah hi ka dei ka jingïalam jong ka District Council kaba long ka nongïada ïa ka jingtrei jingktah jong ki trai muluk hynrei pynban ma ka kaba pynskhem ïa ka jingtrei jong ki bar jylla bad sa kawei ka dawbah ka dei namar ka jingïoh laitlan jong kine ki kompeni ban thied ïa la ki jong ki kali kaba ktah kylla pat ïa ki trai kali trai muluk jong ngi kum ka Star Cement ka don haduh 300 spah, 400 spah tylli ki trok, ka Topcem Cement, ka Amrit Cement bad kiwei kiwei ki kompeni,” la bynrap shuh shuh u kyrwoh.
“Ngi kyntu jur ïa ka District Council ba kan pyntrei hok ïa ka kyndon Trading by Non Tribal khamtam ha kaba ïadei bad ka jingthied kali kine ki kompeni bad kumjuh ruh ïa ka Sorkar Jylla ban khanglad ïa ka jingthied kali jong ki khnang ba kan ym ktah than ïa ki trai muluk kiba don kali bad kiba im kamai na kane ka kam,” ong u kyrwoh.
“Ha kaba ïadei bad ka jingkhot ïakren jong u Symbud Myntri Rangbah uba khmih ïa ka tnat Transports ïa ki nongïalam jong ka MCTODA kano kano ka jingïakhih donkam da ka jingïakren khnang ban pynbeit ïa ka kam, katba kaba sngewphylla pat ba u Symbud Myntri Rangbah uba khmih ïa ka tnat Kam Pohïing lyngba ka tnad Pulit pat u phah kem pynban ïa ki nongïalam ka MCTODA bad kane ka pyni ïa ki jingïapher hapdeng kine ki arngut ki Myntri Sorkar. Kumno yn ïakren haba ki nongïalam kim don?” la buh jingkylli ka JNC bad bynrap, “lada ka Sorkar ka kwah shisha ïa ka suk ka saiñ ka dei ban pyllait shi syndon ïa ki nongïalam ka MCTODA khnang ban don ka jingïakren.”
“Lyngba kane ka khubor ka seng ka phah ruh ïa u kyrwoh sha ki seng jong ki trai kali bad nongniah kali, kata ka JAC jong ki ar tylli ki seng na ri lum Jaiñtia bad ka MCTODA ba kin ïa tylli kum ki khun ka Bri u Hynñiewtrep khnang ba kan ym don kata ka jingïapher jingmut bad ba ki bar jylla ruh kim ym ïoh ban ïuhroit ïa ki trai jylla. Kynmaw ba kane ka dei ka buit jong ki bar jylla ban pynïashruit ïa ngi, ban pynïapher ïa ngi khnang ba ka jingïakhih, ka bha ka miat jong ngi pyrshah ïa ki kan tlot,” la pynkut u kyrwoh.