Lehmon ki nonghikai bad nongtrei ha Patharkhmah Govt. HSS, thung da u Principal ba pura – RBYF

Nongpoh, Jylliew 02: Hadien ka jingud jingnam jong ki paidbah lem bad ki samla pule, halor shibun ki jingduna ha Patharkhmah Government Higher Secondary School ka Ri-Bhoi Youth Federation Western Zone hapoh ka jingïalam u Samla Rishan Nongtri President ryngkat bad ki dkhot mynta ka sngi kila leit ban ïakynduh syndon ïa u Principal In charge ka Patharkhmah Government Higher Secondary School ban ïakren halor kitei ki jingduna bad ka jingdonkam ban pynbit pynbiang ïa katei ka jaka pule ba kan long kawei naki jaka pule ka ban ai jingshakri ba paka ïaki samla pule ha katei ka thaiñ.
Naka liang u Samla Rishan Nongtri haba kren bad u nongthoh khubor u la pynpaw ba ka mat ba hakhmat ba kum ka seng kala leit ban ïakynduh ka dei ka jinglehmon palat ki nonghikai bad kumjuh ruh ki nongtrei ki bym burom satia ïaka por leit trei bad ka por ban mih, kiba wan bad leit katkum ka mon jong ki.
U la ong ruh ba ka seng kala ioh ruh ban pynsngew halor ka jingduna ki nonghikai, ki nongtrei ba la donkam shuh shuh ban pynkhlaiñ naka bynta ban kyntiew ïa katei ka shlem pule kumba haki result bala dep bun naki khynnah ki wan haka kyrdan 3rd Division, bad kum ka seng ka kwah ban pynduna bad ki khynnah kin pass bha bad wan kham shakhmat ha kaba ki nonghikai ki dei ban tip bad ban wad ka daw ka jingduna ki khynnah bad ka jinghiar ka result jong kiba pass bha.
Haduh mynta katei ka shlem pule kam pat don satia ïa u principal ba pura ha kaba la shu thung principal Incharge ïa uwei u nonghikai bad kum ka seng kala dawa ruh ba dei ban thung da u Principal ba pura naka bynta ka jingbit jingbiang jong katei ka jaka pule.
Namar ka jingbun jong ki khynnah kiba rung thymmai haka Class XI kiba don kumba 180 ngut kadei ruh kawei naki jingeh kaba ki khynnah ki mad ban shong tang ha kawei ka kamra klas halor katei ka naka liang ka seng kala ai jingmut ban phiah noh ïaki khynnah laka jong ka section ne wat ban buh da ka morning shift bad ka day shift naka bynta ka jingbit jingbiang jong ki khynnah.
Halor kitei ki jingduna kiba bun naka liang ka seng kyrpad ruh ïaka tnad pule puthi ba kadei ban shimkhia ïa kitei ki jingeh khamtam ban pynlong ruh ka jingjurip ba kyndit ïa katei ka jaka pule jong ka sorkar ban lap ïaki jingduna hangno donkam ban pynbha khnang ba ka pule ka puthi kan nym ktah bad ki khynnah kin ioh ïaka jinghikai bad ka jingstad kaba pura.