Lehburom ka Nongtluh HSS ïa u Bah Edward Shadap kum u Principal bala shongthait

Nongpoh, Risaw 20 : “Nga sngewhun jrut ka mynsiem ban shongthaid noh na ka kam Nonghikai, hadien ba nga la shakri ïa ki khynnah skul bad ïa ka skul hala I bor ba nga don” ong u Bah Edward Shadap, Principal ka Nongtluh Higher Secondary School, Diwon ha ka jingleh burom ka skul mynta ka sngi hadine ba u la shonthaid noh kum u Principal katei ka skul.
Na ka liang ka skul bad ki nonghikai ryngkat ki bor pynïaid ka Northern Ri Bhoi College ki la leh burom ïa u Bah Edward Shadap hadien ba u la shongthad noh kum u Principal bad ba la u la shakri ïa kane ka skul haduh 33 snem ka jingïaid lynti ban kyntiew ïa kane ka skul na ka bynta ban ai jingnang jingstad bad ban saindur ïa ki khynnah skul.
Haba kren ha kane ka jingleh burom, u Bah Edward Shadap kum u Principal ba la shongthaid na katei katei ka skul, u la pynpaw ba u da kmen shisha ban shongthaid noh na ka kam Principal bad kumba u la pynpaw ka long ba kumba la bynshet ïa ka kam ban long u Principal u la trei shitom met bad mynsiem bad um don shuh kano kano ka jingbabe ha kaba katba kaba u lah la ka bor u la ai ka jingshakri ban kyntiew ïa kane ka shlem ban ai jingnang jingstad ïa ki khynnah skul kane ka skul.
Na ka liang ki Nonghikai ki la leh burom ïa u kum ka jingai khublei khatduh shuwa ba un shongthaid na ka kam bad ki khynnah skul bad ki samla pule ki la leh burom ruh da ki jingshad bad ki jingrwai ban ai ka nam bad ka burom halor u synniang u bynhei ba la synñiang da u Bah Edward Shadap kum u Principal ba la shakri haduh 33 snem ïa kane ka Nongtluh Higher Secondary School, Diwon.
Kum ban shu pynkynmaw, U Bah Edward Shadap u la wan ban Ïa snohkti lang bad ka Nongtluh Hr. Sec. School kum u Principal haka 15 tarik jylliew jong u snem 1989 naduh ba dang don tang 53 ngut ki khynnah kiba wan ban pule ha katei ka skul, bad haduh mynta u la dep ban ai ka jingshakri ka ba bha na ka bynta ki khynnah pule bad ki nonghikai jong katei ka shlem ai jingnang jingstad haduh 33 tylli ki snem. Bad mynta katei ka skul kala nangroi ha ka jingnang jingstad bad bad ka nangkiew ha ka jingwan ban pule jong ki khynnah skul.
Ha kane ka sngi ba la leh burom ïa u Bah Edward Shadap kum u Principal ba la shongthaid, la wan shim bynta ruh da u MLA ka Nongpoh, u Bah Mayral Born Syiem, bad ha kane ka sngi u la noh synñiang ruh da ka song pisa kaba Rs. 5 lak bad ka ki kor jingpynshawa sha Norther Ri Bhoi College nalor ki kyntien ai khublie bad sngewnguh ïa Bah Edward Shadap uba la shongthaid noh na ka kam kum u Principal ka Nongtluh Higher Secondary School, Diwon.
Na ka liang u Bah Mayral Born Syiem, kum u MLA haba kren ha kane ka sngi u la ai ka jingïaroh ïa u Principal uba la shakri la 33 snem hapoh katei ka skul bad kum u Nongmihkhmat paidbah u la kular ruh ban dang ai ka jingïatrei lang na ka bynta ban dang kyntiew ïa katei ka skul bad kumjuh ruh ka Northern Ri Bhoi College kaba long ka jingmyntoi na ka bynta ki khun samla ban ioh lum jingnang jingstad ha la ka dong ka thaiñ.