Mawkyrwat, Nohprah, 29: U bah Renikton Lyngdoh Tongkhar, MLA ka Mawkyrwat Constituency bad uba dei ruh u Myntri ka tnad Umbam Umdih jong ka sorkar jylla ha ka 24 tarik u Nohprah, 2022 ula ïoh ban lehkmen bad ai sngewbha khrismas da ki sopti ïa ki khynnah rit jong kane ka dong ka thaiñ Mawkyrwat.
Kane ka jingaisngewbha ka long ruh kum shibynta ban ïa don bynta lem bad ki khynnah rit ha kane ka jingrakhe lehkmen kum ki paid khristan kiba ju rakhe ïa ka jingwan longbriew U Jisu Khrist ha kane ka sla pyrthei ha ka 25 tarik u Nohprah manla u snem.
Ïa prokram jingai sngewbha sha ki khynnah rit, la pynlong ha phyllaw ka ophis treikam jong u MLA ha kaba la aiti ïa kine ki sopti da ki nongïalam ba hakhmat naduh ki longmkie bad ki rangbah kiba dei ki nongkyrshan ba hakhmat jong u bah Renikton Lyngdoh Tongkhar.
