Leh burom ka ophis u DC bad DSO ïa ki rangïaleh ka West Jaiñtia Hills District kiba jop haka 2nd NEOG-2022

Jowai, Nohprah 23 : Ka ophis jong u Deputy Commissioner (DC) ha ryngkat ka ophis District Sports Officer ka West Jaiñtia Hills District kila pynlong ïa ka prokram pynkup burom ïa ki rangïaleh bad ki Coaches ka District kiba la wanrah nam ha ka 2nd North East Olympic Games-2022 kaba dang u dep pynlong shen ha nongbah Shillong.
Ha kane ka sngi ïa ka jingïalang la pynlong ha katei hi ka ophis u DC ka WJHD, ha kaba u MLA ka 2-Jowai Constituency u ma Wailadmiki Shylla ula long kum u kongsan, ha ryngkat ka jingdonlang u Deputy Commissioner ka WJHD ba B.S Sohliya (IAS), u ma M.A. Challam MSC, u DSO ma K. Passah, ki nongkitkam ka WJDSA, ki kmie ki kpa jong ki rangïalehkai bad kiwei de.
Kine ki rangïalehkai kiba la shah pynkup burom ki kynthup ha ka Athletic ki long u Kyrshanlang Shylla U-20 uba la jop ha ka (4×400 m Mixed Relay) Goal, Boys 400 m Silver, U-20 Boys 200 Silver, u Marso Kyndait A-20 men 1500 m Goal, A-20 Men 800 m Silver, ka Durka Nartiang A-20 ha ka Women 4×100 Silver, A-20 Women 100 m Bronze, ka Damika R. Lyngdoh U-20 Girl 4×100 Bronze, u Kermi Biam A-20 Men 4×100 bronze bad u Kelbinus Biam A-20 men 4×100 bronze.
Ha ka Badminton u Mebanker Shullai (mixed team) Bronze, u Gregoreo Passah Bronze. Ha ka Boxing u Baronkupar Synnah ha ka 60 kg men uba la ïoh ïa ka Gold, u Baiamutlang Sungoh 63.5 kg men Bronze, ha ka Football u Oresterwell Langshiang Silver, u Saveme Tariang Silver. U Figo Syndai Silver, u Wandajied Kynsai Ryngkhlem Silver. Ha ka Karate u Ram Lanong (IND Kumite 50 kg men) ula ïoh Silver, ha ka Teakwondo u Handa o hi Papang ha ka (Kyorugi) 80 kg Senior Bronze, ha ka Wrestling u Echwamidao Phawa ha ka 57 kg men Silver bad ha ka Golf u Jason Passah (Amateur) uba la ïoh ïa ka takma Ksiar (Goal).
Naka liang u ma Wailadmiki Shylla haba ai jingkren ula ai ka jingïaroh ïa baroh ki rangïalehkai kiba la treishitom ban wanrah ïa ka nam bad ka burom jong ka West Jaiñtia Hills District hi baroh kawei, u kyrmen skhem ba ka District kan dang kiew shaphrang ha ki kam ïalehkai khamtam ha kine ki snem ban wan.
Ha ka juh ka por u buh ka jingkyntu ïa kitei ki rang ïalehkai ba kin nang ïaibteng ïa ki kam ïalehkai sports jong ki bad ba kin don ïa ka thong ha ka jingim haduh ban da poi sha ka kyrdan International namar kane ka jingjop jong ki mynta ka kynti ka long tang ka jingsdang.
U la pynsngew bana ka liang ka sorkar ruh kala wad ki lad ki lynti ban pynkiew ïa ki rangïaleh kai ka District da kaba wanrah ïa ki skim bapher bapaher na ka bynta ki samla kiba don shisha ïa ka sap ka phong ha kiba bun ki liang.